“O se pisinisi mai Saina ma se faletalimalo i Samoa o le a amatamea i taaloga faitupe
i fale kasino”
Ua amata foi ona aliae manatu faaalia e tetee ai i le faatuina o fale kasino i Samoa poo nofoaga mo taaloga faitupe lea e faafoe i totonu o faletalimalo tetele, peitai ua pasia e le Palemene le tulafono mo le faatuina o ia atinae i lo tatou atunuu. O le malolosi o finagalo ma lagona faaalia e le gata o le atunuu ma nisi o faalapotopotoga tumaoti ae o ekalesia i le teena o lea fuafuaga a le Malo.
Peitai o lea ua faailoa e le pulega o taaloga faitupe a Samoa le faamatuu atu nei o laisene e lua mo le faatinoina o lea ituaiga o pisinisi saili tupe.
Ua faailoa e le komiti mo le pulega o taaloga faitupe le Gambling Control Authority Board, o se pisinisi i Saina ma le faletalimalo o le Aggie Greys Resort i Samoa ua faamatuu i ai laisene mo le faagaioia o fale kasino.
O le kamupani poo le pisinisi mai Saina e ta‘ua o le Chengdu Exhibition and Tourism poo le ETG i lona ta‘uga faapuupuu sa malaga mai i Samoa ni ona sui ma faatalatalanoa ai le latou talosaga mo se laisene ma ua faaalia ai e le pulega o taaloga faitupe ua faamalieina atoatoa i tulaga o loo iai lea kamupani, o le mafuaaga lea o le talia o le latou talosaga mo se laisene e faatino ai se fale kasino.
O le kamupani foi lea o loo fuafua latou te fausia se faletalimalo faitau miliona lona tau i Samoa, e pei ona iai se fuafuaga e faatuina lea pisinisi tele i se vaega o fanua o le esetete tausi a le Malo i Mulifanua e lata i le malaevaalele faavaomalo. O loo iai foi se fuafuaga a le ETG e na te aumaia ni malaga tuusao a vaalele i le va o Samoa ma Saina faapea isi atunuu Asia.
O loo aiaia i le tulafono o fale kasino ua na o tagata mai fafo e umia tusi folau o isi atunuu e faataga ma mafai ona ulufale i fale kasino i lo tatou atunuu.
E lē faatagaina tagata Samoa, ae e avanoa mo tagata Samoa e umia tusifolau o tulaga tau tagatānuu o isi atunuu, e pei o o tatou tagata ua maua tulaga tagatānuu poo sitiseni i Amerika, Ausetalia, Niu Sila ma isi atunuu ua aumau ma nonofo ai, aemaise foi o tatou lava tagata na ola ma soifua a‘e i isi atunuu.
O atugaluga o ekalesia, o le a avea fale kasino ma faitotoa o nisi mau soligatulafono o le a tutupu ma aliali mai e aafia ai o tatou tagata.
