Ua savalia nei le tolu masina talu ona amata le polokalame o le savali faamalositino a le Walking Samoans, e pei ona amatamea mai ai le Radio Samoa ma nisi o ana paaga mai le masina o Tesema i le tausaga na tea nei, ma o loo faagasolo pea i Aso Faraile taitasi i le 11.30 i le taeao.
O le faatāuaina tele o lenei polokalame auā le tausia o le soifua maloloina saogalemu, ua tuutuu mai ai foi tau‘au fia fesoasoani o le Matagaluega mo Taui o Faalavelave Faafuasei, le ACC, o i latou o loo nafa ma polokalame faalauiloa mo le tausia o le saogalemu mai faalavelave tutupu i luga o le sami, le laueleele ma le ea, e unaia atili ma faamalosiau mai le savaliga a le Walking Samoans.
E toatolu sui o le ACC na auai mai le savaliga i le Aso Faraile na tea nei, Toleafoa Neil Soonalole, Asiava Atonio Tuipea, ma Ata Nonumalo Sofara.
A o lei amata la le savaliga, sa muamua ona saunoa le o sui o le ACC, le afioga ia Toleafoa Neil Soonalole, e tau faamanino le autū o galuega faalauiloa a le ACC aemaise o le naunau e fia lagolago i le savaliga a le aufaigaluega a le Radio Samoa ma le mamalu o le atunuu o loo auai mai ai.
Na tufatufa ai foi i i lea aso ma ni meaalofa mai le ACC auā lava le fesoasoani atili ina ia matuā tulai mai ni iuga lelei i le polokalame savali o loo faagasolo, lea ua tofu ai le au savavali ma se tamai faguvai (water bottle) ina ia maua sina faasūsū o le laualo a o alu le savaliga.
Sa tufatufa ai foi ma fusi mamafa mo tapuvae (ankle weights); e tofu le vae ma le fusi mamafa, ma e iai le eseesega o mamafa i fusi o vae mo alii ma fusi o vae mo tamaitai savavali. Sa amata le savaliga i le na o le aufaigaluega lava a le Samoa Multimedia Group, ma nai tina matutua sa auai, ae o le faasolosolo pea o vaiaso ua vaaia ai le faatupulaia o i latou ua faaavanoa lena taimi o le Aso Faraile, e auai mai ai i le savaliga.
O lenei polokalame na afua mai lava ona o se faanaunauga ina ia unaia atili o tatou tagata e faatāua le faaalu o se taimi mo ni faamalositino auā lava lo tatou soifua maloloina, aemaise o le savali o se tasi o faamalositino e sili ona faigofie le faatinoga, ae aunoa foi ma se seleni e alu ai.
O luga o le Radio Samoa i taeao o Aso Faraile taitasi o loo vili mai ai ma faatalanoa nisi o tamalii o Samoa e pei o le alii faipule, Tofa Su‘a William Sio, le tamaitai loia, Afioga Leuluaialii Olinda Woodroffe, faapea foi nisi o faafeagaiga ma i latou uma o loo lagolagoina lenei faamalositino, e ala i le savavali foi poo fea lava le pitonuu o loo alala ma latalata ane ai se vaipanoa o faatino ai a latou savaliga faamalositino.
O le faanaunauga e tasi, ia avea faataitaiga lelei o loo faia e nei tamalii o le atunuu i le faatāua o le tausia o le soifua maloloina lelei, e ui i le tele o tuatuagia i galuega ma tiutefai o loo tautua ai, ae faaavanoa lava se taimi e savavali ai, e avea ma luitau mo i latou o loo fia faalusi le tino ma fia soifua maloloina, ae lē o tele ni gaioiga e faatino, e oo lava i se mea faigofie e pei o le savali.
O loo maua pea le avanoa e lesitala ai le suafa o soo se tasi e fia auai mai le savali mo le soifua maloloina a le Radio Samoa, pe a faafesootai mai lo latou ofisa i Manukau, e totogi ai le $15 e lesitala ai le suafa ae maua ai le mitiafu ua lolomi ai le Walking Samoans, ma tuu ai le suafa i le se‘i e faia i faaiuga o masina taitasi mo nisi o faailoga.

