O le afioga i le Ao Mamalu o le Malo o le Malo, Tuiatua Tupua Tamasese Efi ma lana masiofo o Filifilia Tamasese, sa avea ma malo faaaloalogia i le koneferenisi a atunuu o le Pasefika sa usuia i Amerika Samoa i le vaiaso na tea nei o lea sa autū i ni taitai o le lumanai le Future Leaders of the Pacific Conference.
E le gata ina avea le ao mamalu ma lana masiofo ma malo faaaloalogia ae e faapea foi i le Kovana sili o Amerika Samoa le afioga Lolo Matalasi Moliga, ma le Palemia o Niue o Toke Talagi. O le koneferenisi na amata usuia i le amataga o le vaiaso ua mavae e oo mai i le Aso Faraile na tea nei, le aso 8 o Fepuari 2013.
Sa talanoaina ai mataupu e pei o suiga o le tau, soifua maloloina lautele, le tutusa o alii ma tamaitai, ma le maua pea o alaga‘oa tau atiina‘e poo le sustainable development.
Sa tapena e le ofisa o le Amepasa o le malo o Amerika lea faatasiga tele sa filifilia i ai ni sui e toatolu mai Samoa e aofia ai Karl Laulu, Toai Bartley, ma Theresa Penn.
O loo galulue i latou i le matagaluega o Tupe, le matagaluega o le va i fafo ma le matagaluega o puna‘oa faalenatura ma le siosiomaga.
Na feiloai muamua i latou ma le Amepasa o Amerika mo Samoa o David Huebner ma faafetaia ai e le Amepasa le sao tele o i latou nei i galuega mo le lelei o tagata lautele, le mafuaaga ua filifilia ai i latou e fai ma sui o Samoa i le koneferenisi.
