Ua sauni le susuga Fineaso Aimaasu ma lana loia o Ameperosa Roma, e tuuina atu i le faamasinoga i le Aso Tofi o le vaiaso nei molimau e teena ai tuua‘iga ma moliaga o Fineaso e aofia ai le faia o ni uiga faasotoma ma le faia o ni gaioiga matagā.
O se alii talavou sa nofosala i le nofoaga mo tupulaga talavou ua aafia i ni solitulafono i Olomanu na ia faaulu se tagi faasaga i le alii leoleo Taitai Leoleo poo se Police Inspector o loo faamalolo lē tumau mai ona tiute faaleoleo, seia tālia se faaiuga a le faamasinoga.
O Viliamu Faaleleina sa nofosala i Olomanu lea na ia faamatala i lana molimau, e na o ia le faafafine sa iai i le nofoaga ia Tesema o le 2006, lea na tulai mai ai gaioiga na faia ia te ia. O le tuanai o le aso Kerisimasi o le tausaga lea na faatino ai ia te ia e lē o loo molia i le nofoaga o Taumeasina e latalata i Apia.
O le vaitaimi lea faatoa 19 ona tausaga ae o le taimi nei ua 23 tausaga o lona matua. O Fineaso sa ia vaaia le nofoaga i Olomanu lea na tulai mai ai le mataupu, e pei ona faamatala Viliamu e faalima ona faia nei gaioiga ia te ia. O lana molimau na ia ta‘ua ai o le aso 14, 15, 18, 19, ma le 20 o Tesema 2006.
O le molimau lava a Viliamu na ia faailoa ai i le faamasinoga e faapea e avatu ia i Olomanu e toa 13 isi alii talavou o loo iai, ma o ia na atoa ai le 14. O ia e tele lava ina tofi e faia meaai. O se isi aso a o faia lana galuega na valaau atu ai le alii pule e alu atu sei fofō ona vae. Na faatonuina ai o ia e faatino ni gaioiga matagā.
O se tasi o alii sa tuli ai lona faasalaga i Olomanu i le taimi lea o Lui Winterstein, sa ia molimau i lona mauaina o se gaioiga a lē o loo molia na faia i lē na tagi. Sa ia faamatala foi se tasi o po na taunuu ai i Olomanu ua tea le 11, na ia vaaia ai le savali punou o lē na tagi.
Na fesili i ai pe aisea ae faapea ane e tiga lona manava. O le taeao na sosoo ai na ia vaaia ai ua pisia le ieafu o lē na tagi (Viliamu) i le toto ma fesili loa pe aisea.
Na tali ane Viliamu e pei ona molimau Lui, o le palapala mai lona nofoaga ona o le feusuaiga faasotoma na faia ia te ia e lē o loo molia.
O le alii loia o Ameperosa Roma sa ia tuliloa le moni o le molimau a Viliamu i tuua‘iga lea na ia folasia ai e sese uma ia faamatalaga, ae na mafua ona faia e Viliamu tuua‘iga ona o le atalii o lē o loo molia e galue i le ofisa faanofo vaavaaia na ia toe molia atu Viliamu ona ua lē usitai i aiaiga o lona faasalaga.
Na faailoa foi e le alii loia i lē na tagi lana molimau na teena e le faamasinoga i se isi mataupu na molia ai se alii ofisa o le vaega faanofo vaavaaia i le moliaga o le talepe fale. Na molimau ai Viliamu na faaoso o ia e lea alii ofisa peitai e lei talitonuina lana molimau e le faamasinoga lea na solofua ai le moliaga o le alii ofisa.
