O se fale fogafalelua ua faatūina i se nofoaga e afea soo i Vaitele-uta, ma ua tulatalata lava i nofoaga o galuega e pei o le falegaosi ‘ava o le Vailima ma le YAZAKI Samoa.
O le falemai lea MEDCEN lea ua faatuina i lea nofoaga fou ma o se faaopoopoga lea o le auaunaga a le falemai tumaoti lenei i Samoa.
Faaalia e le tasi o alii pule o lenei falemai tele, o Dr Emosi Puni, talu ona faavae le MEDCEN i Vailima ua faaopoopo pea le numera o le atunuu ua o latou faaaogāina le latou tautua.
“Ua tele foi tausaga o vaaia pea le toatele o le mamalu o le atunuu ua faamautu i lenei itu o Vaitele, o se nofoaga ua tele aiga fou ua faamautu ai ma o se nofoaga foi e tumutumu ai le lautele o le atunuu ona o fale faigaluega ua faatutū ai,” o se faaaliga lea a Dr E. Puni.
“O le mafuaaga lava lea o le vaavaai i lenei itu o Faleata auā le faatū ai o se falemai”.
O le faatū ai o lenei falemai i Vaitele ua vaaia ai ma ni suiga i le auaunaga e pei ona iai le pa‘ū i le vaaiga o le fomai lea sa masani ona $60 tala sa totogi e le atunuu ae o lea ua pa‘ū i le $25 i le siaki e tasi.
O isi tau faaopoopo e fuafua lava i le manaoga o le gasegase pe aofia ai ma vailaau ma fualaau, pe aofia ai le tui poo le taofia foi.
O le toatele lava o loo galulue nei i le MEDCEN o fomai ma tausi soifua sa galulue foi i le falemai o le Malo, peitai ua see ese nei ona o le manaoga i totogi maualuga atu aemaise foi se isi avanoa ua iai nei mo le faatinoga o a latou galuega.
O taitai o le Malo na auai atu e molimauina le tatala aloaia o lenei Maota Gasegase tele ma ua lua ai nei lala o le MEDCEN i le motu o Upolu ma na ta‘ua e Dr Puni atonu o le a vaavaai foi mo le saga faalautele ai o le auaunaga a le nei falema‘i pe a mautu lona tulaga o iai nei i Vailima ma Vaitele.
O le MEDCEN ua silia i le 10 tausaga talu ona faavae mai ma o se falemai na faatū e Dr Emosi Puni ma Dr John Adams o nisi ua tele tausaga o tautua i le Malo i galuega faafomai.
Ua faaopoopo i ai le tele o isi fomai ua i‘u mai i fafo ma tausi soifua ua tele tausaga o tautua foi mo le Malo.
E leai se falemai o tautuaina le itumalo o Faleata ona o Vaimauga ma Faleata o loo faaaogāina le Maota Gasegase tele o le Tupua Tamasese Meaole i Motootua ae o lea la ua iai nei se isi falemai o le a mautinoa le faaitiitia ai o le numera o le atunuu e faatalitali pea mo fomai pe a oo ina pisi Motootua.
