Ua taape le fonotele i Malua i lenei tausaga ma le tele o galuega faatino na talanoaina aemaise o auala e faaleleia atili ai galuega faaleagaga a afioaga taitasi ma matagaluega eseese a le Ekalesia.
O se tasi o iugafono ua pasia lona faatinoina i lenei tausaga ua aofia ai se ofisa mo le auaunaga faafaufautua auā sui o le Ekalesia ua mafatia ma ua iai le manaoga e saili fesoasoani mo tali o le mau faafitauli o le olaga e feagai ma i latou.
O lea ofisa ua ta‘ua e le Failautusi Aoao o le Ekalesia, le Susuga Iutisone Salevao, ua manatu le Ekalesia ua talafeagai aemaise lava i tupulaga o le Ekalesia o loo sailia fesoasoani solo, ae o le mau a le Ekalesia o le avanoa o ofisa faapenei o le a fesoasoani ai foi i fanau a le Ekalesia poo soo se tasi lava e afea lea ofisa auā le tali atu ai i faafitauli o feagai ma i latou.
Faaalia e le Failautusi o se tasi lava lea o mataupu na tele se taimi e talanoaina ai ma o le a faatu i le Fogafaleono o le Ioane Viliamu lea ofisa.
O le isi galuega ua taulai i ai le vaavaai a le Ekalesia e pei ona pasia nei i le Fono Tele o le faatuina lea o se faletupe ma o le tausaga e 2014 ua agai i ai le taulai e tatau ona oo atu i ai ua mautu lea atinae.
O le manatu faaalia o le toatele ua talanoaina lenei mataupu, ua alagatatau lea atinae ona o le vaavaai i le tele o le fesoasoani o le a mafai ona maua mai i lenei ituaiga atinae. Peitai ane ua malilie foi ta‘ita‘i o le Ekalesia ma sui usufono e lē faigofie lea laasaga tele ma o le a faapea ona sailiili atili a o lei faamautuina lelei lea manaoga.
O se faletupe o le a mafai ona teu ai le tusa ma le 15 miliona tala o tupe a le Ekalesia o loo taape i isi faletupe o fefaatauaiga i totonu o Samoa.
O nisi o auala na laga ai i le faatūina o se faletupe faapenei, o le faamāmā avega i sui o le ekalesia i taimi o taulaga, o le Fono Tele, aemaise isi atinae e fia faatautaia a le Ekalesia, ona see ese lea ma le masani o loo fai nei o loo maua ai lava le tului tele mai i nonogatupe ma faaputugatupe a sui o le Ekalesia.
Ae o le faiga lenei o le a toe foi mai le seleni a le Ekalesia e fesoasoani ai i o latou sui, ma maua ai foi le tului mamā, ae o se tupe mamā lea e mafai ona fesoasoani atili i le Ekalesia.
O le vaavaai i faletupe ma galuega faaleagaga, atonu o se vaaiga lea na umi ai ona lotea lenei mataupu ae e lei vaavaai lelei lava i ai, ae o le tausaga lenei o le a manatua i le mafai ai ona faataatia i lumāmea lenei atinae ma le vaavaai loa e faatautaia.
O le a tele foi le tausinioga i le va o faletupe ona o se atinae faapea, ae o le vaavaai mamao lea a taitai o le Ekalesia e pei ona talanoaina ai i Malua, e toe foi le seleni i tagata lautele o le atunuu aemaise sui o le EFKS ae o le a faaauau ai foi ona galue lea seleni mo atinae eseese a le Ekalesia.
O le faapotopotoga o Tapuaiga, o le Worship Centre lea foi na talanoaina sana atinae faapea ae e oo mai i le taimi nei, ua ave le faamuamua o lea fuafuaga a le Worship Center i lana televise ua mae‘a ona tatala aloaia ae e lei faatautaia se faletupe e pei ona pasia foi i le fonotaga a lea tapuaiga.
Na faaalia e le susuga i le Failautusi Aoao a le EFKS, sa iai lava manatu faaalia ona e tatau ona matuā maioio lelei le faatinoga o lenei atinae a o lei faatuina, ma e telē lava le suesuega o le a agai i ai le Ekalesia i le talafeagai ai o lenei atinae a o lei faamautu atoatoa.
