E ui ua maualuga le faatāua ua ave ia i latou e iai manaoga faapitoa, ae o loo manino lava le faigata o le soifua o i latou nei pe a oo ina saili avanoa faigaluega. O se tulaga lea ua vaavaai pea i ai le Faalapotopotoga ua galulue e unai avanoa tutusa mo i latou e iai manaoga faapitoa – le Nuanua o le Alofa.
“O loo iai lava auala e faafaigata ai ona maua e i latou e iai manaoga faapitoa avanoa faigaluega, ma o a‘oa‘oga ua unaia i lenei vaitau ina ia mafai ai ona maua e fanau nei ua i le matua e saili galuega ai se isi fesoasoani ina ia faalautele atili ai le tomai i auaunaga e mafai ona maua ai a latou galuega,” o se faamatalaga lea a le Failautusi o le Nuanua o le Alofa, le tamaitai o Fuatino Utumapu.
O a‘oa‘oga ua faatautaia mo fanau e iai manaoga faapitoa ua aofia ai le tomai i le faaaogāina o computers, ma o se a‘oa‘oga tāua tele aua ua iai ma polokalamae ua faapipii nei i computers ina ia mafai ai ona faaaogā e i latou e tauaso.
O le tomai tau i auaunaga lautele e aofia ai le talitelefoni ua a‘oa‘oina foi. Ua a‘oa‘oina foi le tomai i galuega tau faasalalau.
O le tamaitai o Faaolo Utumapu na soifua mai e po faatasi ai ma lona uso le tamaitai o Fuatino Utumapu lea e failautusi o le Nuanua o le Alofa, o ia lea o loo faatautaia le a‘oa‘oga e pei ona faagasolo nei mo fanau e iai manaoga faapitoa.
Ua faapea foi ona fesoasoani i ai le Peresitene o le Nuanua o le Alofa le alii o Nofovaleane Mapuilesua i lenei taumafaiga.
“Sa ave le faaaliga i mātua o fanau nei poo ai e iai le manaoga e faalautele le tomai auā le sailiga o galuega, ma o mātua ia na tali mai ua iai o latou alo i lenei polokalame,” o se faaaliga lea a Fuatino.
O le tamaitai o Faaolo Utumapu faato‘ā foi mai i Samoa mai a‘oa‘oga na faamautu ai le Masters Degree i le tomai tau i fesootaiga ma galuega faatusitala ma e ui i le tauaso o lenei tamaitai, e lē o faaitiitia ai lona soifua finau.
O le taimi lenei o loo galue Faaolo o se tasi o faatonu o talafou ma polokalame ua tuufaatasia ma faasalalau i le leitio o le 89.1FM atoa ai le TV Tasi i Mulinuu.
O le Peresitene o le Nuanua o le Alofa, Nofovaleane Mapuilesua o loo galue o se talitelefoni mo le vaega o auaunaga lautele a le kamupani telefoni feaveai o le Digicel, ma e pipili lea alii o galue o se inisinia o leo mo le Leitio a le 2AP. E tele tausaga o galue o ia o se inisinia mo le televise a le Malo sa iai, le SBC.
O i laua nei o loo faaauau ona finauina le tele o avanoa tutusa e tatau ona vaavaai i ai le Malo auā i latou e iai manaoga faapitoa e pei o auala mo feoaiga a lea vaega toatele o le atunuu i tafatafa o le alatele.
Ua finauina foi ofisa uma a le Malo ina ia iai ni nofoaga mo i latou e feoai i nofoa faataavalevale.
Ua le gata i lea ae ua finauina le tele o avanoa e tatau ona maua ai galuega a i latou e iai manaoga faapitoa, ma o se tasi lenei o taumafaiga ua vaaia le malosi mai o le Nuanua o le Alofa latou te unaia.
E tusa ma le $100,000 (selau afe tala Samoa) le fesoasoani ua foai ane e le Vaega o Fesoasoani a le Malo o Niu Sila le NZAID mo le taumafaiga lenei a le Nuanua o le Alofa. O se tasi lenei o Malo ua faaauau ona fesoasoani i taumafaiga mo le faaleleia atili o soifua o tagata ua iai manaoga faapitoa.
