E fiafia lava e toe faafeiloai atu i le mamalu o le tatou aufaitau mo lenei foi vaiaso. Talofa, talofa lava. Malo le folau, malo foi le soifua manuia. E iai lava le talitonuga maualuga o loo manuia tamā ma tina matutua o lo tatou atunuu, aemaise ai le lautele ma muliauma eseese o loo alaala ma papaaao poo fea lava le itu o le lalolagi o loo nopia‘i ai. Faafetai mo le tapuaiga, ma talotaloga mo se manuia o le atunuu i soo se tiute ma galuega o feagai ai.
O le vaiaso nei o le a silasila ai i se tasi o tamaitai poo se tina Samoa foi, ua avea nei ma faatonusili mo Aukilani atoa, mai Workworth e oo atu i Meremere, mo le matagaluega o alagaoa ma atinae a Niu Sila.
Faailoga
(Masters Degree in Public Mangement, a NZ Diploma in Business Studies and a Diploma in Business Management)
Soifuaga i Samoa
Na soifua mai Losalina i ona tuaa, le afioga ia Sala Tulo Tuala mai le afioaga o Leauvaa, ma le tina ia Naomi Chan-See mai le alalafaga o Moamoa i Apia. O le afioga ia Tuala e pei ona ta‘ua, e tupuga mai poo lona tuaa, o se tasi foi o tamalii sa avea ma Faamasino i le Faamasinoga o Fanua ma Suafa i Mulinuu i tausaga ua mavae.
O Losalina ua faaipoipo atu i se alii papalagi Niu Sila, ma ua toalua o la alo, o loo alaala foi i Aukilani lava. O loo galue ma faamautu lona ofisa i le nofoaga autū o fesootaiga ma tagata lautele, a le matagaluega lava a le Social Development.
Soifua a‘oa‘oina i aoga maualalalo/kolisi
Sa uluai a‘oa‘oina i le aoga maualalo poo le aoga tulagalua a le Ekalesia Katoliko i Leulumoega Tuai, sa faaigoaina o St Joan of Arc i lena vaitaimi. O le tausaga e 1974, na ulufale ai i le kolisi a St Marys i Vaimoso i Apia. E lima tausaga sa a‘oa‘oina ai i lea kolisi ma sa taualuga lona taumafai i St Marys i le 1978, lea na filifilia ai e avea ma taiulu mo ta‘ita‘i tamaitai i le aoga atoa (Head Girl).
A‘oa‘oga i Ausetalia ma Saina mo avanoa faasikolasipi
Sa maua le avanoa e faasikolasipi ai i atunuu i fafo. O Ausetalia na muamua maua ane ai lea avanoa. Sa faataunuu lava le aga‘i i fafo mo a‘oa‘oga, ma sa faapitoa lava le a‘oa‘oina i le mataupu faatusitala. E lua tausaga talu ona amata a‘oa‘oga i Ausetalia, ae toe suia le faamoemoe ma le manatu, ina ua maua ane foi se isi avanoa sikolasipi mai le atunuu o Saina.
