Ile tele o faitioga ile faaletonu o togi o suega a fanau ole tausaga 12 mo le suega ole Samoa School Certificate, ma le SSLC faapea le suega mo fanau ile tausaga valu le SPECA, o lea ua mae‘a ona faatino le toe siakiina uma o mataupu ma togi, ma ua tauaao nei e Pule aoga e lē gata o aoga ale Malo ae o aoga a Ekalesia ma aoga Tuma‘oti le faaiuga o suega ale fanau.
Ise pepa o faamatalaga mai le Matagaluega o Aoga Taaloga ma Aganuu ua faailoa ai, ua faamaonia iuga aloaia o suega ile Aso Gafua 30 Ianuari 2017. O lea faamaoniga na faia ina ua mae‘a lelei ona toe siaki auiliili ina ia mautinoa le sa‘o lelei o galuega faatino i totonu o Aoga (internal assessment – IA) ma togi o suega (exams).
Ole Aso Lua 31 Ianuari 2017 ma le Aso Lulu 01 Fepuari 2017 na faamatuu atu ai lipoti o Iuga aloaia o Suega (SPECA, SSC & SSLC) i aoga maualuluga uma i Upolu ma Savaii, ma tuuina atu ai foi Iuga ole SSLC ile Iunivesite Aoao o Samoa.
Ole taliaina o talosaga mo le toe faitauina o togi sa faaauau lava seia oo ile Aso Lulu 01 Fepuari. Ole faaaogāina o togi ua suia, ose galuega oloo faaauau pea seia aulia le aso 15 Fepuari 2017.
Ole siaki auiliili ina ia atoatoa le sa‘o o togi o fuataga (Internal Assessment) na faatino ina ia fetaui lelei lona taatiaga ma le polokalame faatekonolosi fou oloo faaaogāina.
E lē o faailoaina mai ile pepa o faamatalaga lenei na maua ile faaiuga ole vaiaso, pe toafia fanau na aafia ile faaletonu, ae ole maua ai ole faaiuga o ia suega aemaise le Vasega 13 ua faailoa ai ele pulega ole Iunivesite Aoao ise faasilasilaga faalauaitele i luga o fesootaiga televavave ole facebook, le toe fetuunai ole maka poo togi e pasi ai le tama ma le teine e ulufale ile vasega faavae poo le foundation faapea ma togi e talia ai i mataupu tau matata eseese.
E lua vaiaso ua tuuina i fanau amata atu ile vaiaso nei e oo ile aso 17 o Fepuari e toe suia ai a latou mataupu e maua ai le 30 pasene e talia ai ile tausaga faavae ole Iunivesite, ae 20 pasene e talia ai mo mataupu ile matata eseese. E lē o faailoaina foi i lea faasilasilaga pe o ā ni mafuaaga.
