Ole itula e 9 ile taeao ole Aso Tofi 09 o Fepuari na faataunuu ina ai le uluai feiloaiga ale Pacific Gardeners poo le mafutaga a i latou e fiafia ile faifaatoaga ma faitogalaau. O lea feiloaiga e pei ona faailoa ile vaiaso ua tuanai, sa faataunuuina ile Te Puke Hall i Otara.
O lenei tauata‘iga, Pacific Gardeners ose tapenaga na tapena ele Eventpolynesia, ae ua faapea ona lagolago iai le Health Star Pacific, e pei ona faailoa ile vaiaso talu ai… a‘o tālia ai fesootaiga ma le Auckland City Council ma Local Boards a itumalo taitasi, i la latou pitolaau e lagolago ma fesoasoani ai i o tatou tagata ma atinae e pei ona ua tulai ai le Pacific Gardeners.
Saunoa le taitai ole Pacific Gardeners, le tofa ia Teleiai Edwin Puni… “E 28 aiga na auai atu o latou sui i lenei feiloaiga amata… Otara – 11 aiga; Mangere – 6 aiga; Manukau – 3 aiga; Manurewa – 2 aiga; Papatoetoe – 2 aiga; Otahuhu – 1 aiga; Panmure – 1 aiga; Botany – 1 aiga; North Shore – 1 aiga.
Mai lenei aofaiga o aiga na auai, e 3 togalaau ua mae‘a ona totōina: 2 i Manukau, ma le 1 i Manurewa. Ole 2 i Manukau, ole togalaau ole tofa a Faamoetauloa Isaako ma le tausi ia Vao, ma le togalaau o Aitaua ma Faatoina, ae ole 1 i Manurewa, ole togalaau ale afioga ia Taulapapa Robbie ma le faletua ia Kaleta Siolo.
E 3 togalaau ole a totōina ile vaiaso nei: 1 i North Shore (Tuala Tevaga), 1 i Mangere (Aiolupo Fonofili & Lusia), 1 i Panmure (Patosina Winterstein). Ole tala mulimuli mai le taitai (Teleiai Edwin Puni)… “ose faafiafia loto lea tulaga ona ua molimauina ai le agaga ole galulue oloo tumau pea i o tatou tagata…”
Ole afioga la ia Tuala Tevaga ole a oo iai le Pacific Gardeners i lona maota i Glenfield, North Shore e amata mai ai le polokalame ile Aso Lulu nei 15 Fepuari…
E faatino ele polokalame le amataina ole togalaau poo le vegetable garden a Tuala, e ala ile galueaiina ole eleele, foaiina o faalelei eleele ma laau totō, ia ma toto ai lava ile aso lea … Ole tulaga foi lea ole a iai aiga uma ole a fesoasoani iai le Pacific Gardeners ile amataina o a latou togalaau.
Ole Aso Tofi o muamua, 16 Fepuari ole a toe feiloai ai le aufaifaatoaga Samoa ile Te Puke Hall i Otara ile 9am – 10am mo le sosooina ole polokalame.
Ole avanoa mulimuli lea mo ni aiga Samoa e fia resitala mo lenei faamanuiaga.
O lenei faamoemoe e iai le faanaunautaiga, e lē gata ole a maua ai se fesoasoani i tulaga tau faamalositino, ole fesoasoani i tulaga o taumafa e maua ai le soifua maloloina, ole faasaoina o seleni mai faatauga, aemaise ole a feiloai ai foi i latou e taga tutusa o latou finagalo ma manatu i fuafuaga, galuega faatino ma le mafutaga mafanafana ma nisi ole atunuu sa lei masani ile tele o aso a‘o iai i Niu Sila nei.
