O Aokuso ole tausaga e 2015 na sosola ai ni pagota mai le falepuipui i Tafaigata. Ole solaaga lea na alu ai ma le pagota o Daniel Vailopa. Ole Aso Sa, 2 o Aokuso 2015, na alu ai se tamaitai papalagi sa i Samoa e savali ile mauga o Vaea lea e masani ona o ai tagata e fia faapa‘ū pauna ma faamalosi o latou tino ma savavali ile tumutumu ole mauga oloo lagomau ai le tusitala lauiloa mai Sikotilani o Ropati Lui Sitivinisone.
A‘o alu le savaliga ale tamaitai ole vaega tonu lea sa oo ane iai le solaaga a pagota. O Daniel Vailopa na latalata tonu ile vaega na savali ai le tamaitai, ma na faamatala ele pagota i leoleo sa ia vaaia le telefoni feaveai ale teine oloo faamau i autafa o lona ofuvae pupuu ma mea faalogo oloo i ona taliga.
Faaalia i faamaumauga a leoleo na latalata atu iai Daniel Vailopa ma ia aveese le telefoni ae ave loa le tamaitai ise vaega tuufua ole nofoaga e lē iloa atu ese isi, ma taumafai ai loa e faatino se solitulafono lea e faapea na taumafai le pagota e tatala le laei ole tamaitai.
E lei faailoaina ile tolaulauga ale faamasinoga ina ua lau le faasalaga ole pagota pe na faapefea ona toe mamulu ma lima o Daniel le tamaitai palagi ma mafai ai ona alu ese ae faasaoina lē na aafia ile solitulafono.
Ole gaioiga lea ale pagota na mafua ai loa ona suesueina ina ua toe maua uma pagota ole solaaga. Na ioe lē ua molia i moliaga ole gaoi e mafua ile telefoni feaveai ale tamaitai palagi, ma le moliaga ole taumafai e faatino se faigaaiga faasolitulafono poo le taumafai e faamalosi le tamaitai.
Ile folasaga ale tamaitai loia le susuga Alalatoa Rosela Papalii sa tu mo le pagota ma ia tautino ai ile solitulafono na faia ele alii o Daniel, peitai sa ia augani ma le faatauanau ile faamasinoga e silasila ile olaga muamua ole alii pagota na amata ona aafia ai i solitulafono ina ia faia se fesoasoani ale faamasinoga e ala ise faasalaga alofa.
Ole isi itu na ia faailoa ile faamasinoga e ui i solitulafono sa molia muamua ai le pagota e pei ole gaoi ma le talepe fale ae ole taimi muamua lava lea ua molia ai ise solitulafono tau i faiga faamalosi e faatino ai se feusuaiga faaulugalii.
O Iulai ole tausaga nei e mae‘a ai ona tuli le faasalaga lua tausaga ole pagota mai solitulafono muamua e aofia ai ma le faasalaga ile sola ese ma le falepuipui. Ole tuutuuga ale faamasinoga a mae‘a lona faasalaga oloo tuli nei ona faatoa amata tuli lea o lona faasalaga fou e 3 tausaga ma le ono masina mai moliaga ole gaoi ma le taumafai e faatino se feusuaiga fai faamalosi ile tamaitai palagi.
