O le Aso Toonai na tuanai atu le semina faaiu a le Fono Aoao a Tagata Samoa i Sini lea sa valaaulia ai le tamaitai leoleo iloga ia Constable Genelle Warne e fai ma saunoaga autu. O lenei tamaitai leoleo na maua le faailoga o le leoleo o le tausaga ma e mataina foi ana galuega suesue na foia ma faasalaina ai foi nisi na faia ni soligatulafono matautia i Ausetalia nei.
Na amata le sauniga lotu na taitai e Ps Iakopo Lesu‘i ma Ps Laikum sosoo ai ma le faafiafiaga a le alii pese iloga ia Lealai Sone Mariner se sui o le Fono Aoao. Na saunoa foi le susuga Nuaalii Tua Afele o le mafutaga a le Samoa Community Service e momoli le faafetai i le Fono mo le galuega tāua o le 2014 ua faaiu.
I le saunoaga autu a le tamaitai leoleo ia Constable Genelle Warne na ia faamanatu ai i le aofia le faigofie o le afaina o soo se tasi i moliaga o le sauaga poo le faaoo lima i totonu o aiga. Sa toe fagufagu ai foi i lenei vaitaimi o aso fiafia le lamatia foi o aiga ma faigauo, mafutaga ma ekalesia i le femisiaai aemaise i taimi o le taumafaina o le ava malosi ma aafia ai i nei mafatiaga.
O le mataupu lenei ua tulai ai foi le toatele i luma o le faamasinoga ma molia aemaise le falepuipui i soo se atunuu. Saunoa Genelle Warne o le siisii o le leo ma le faamata‘u e ala i le fia faatinoina o se mea e manao ai e ono molia ai foi. E lē tao tasi foi le tulafono i tamaitai pe a sauaina ae faapea foi le molia o tina ma tamaitai e sauaina a latou tane, uotama ma le itupa o alii.
O le faigata o le mataupu lenei e pei ua masani ai soo se atunuu ma ituaiga, o le molimauina lea i totonu o aiga mai le tuputupu a‘e o fanau ma molimauina nei itu matuia i totonu o aiga. “Sa ou soifua ane foi ma molimauina nei faiga i totonu o lo‘u aiga ae peitai ua ou iloa nei e lē sa‘o ma lelei lea uiga,” o se tautinoga lea a le tamaitai leoleo. Sa auai foi Maria Tuitama o le aoga Samoa faapea sui o le Sini Sisifo Mafutaga, afioga Maposua Ili ma See e faatāuaina lenei faamoemoe.
O le luitau i lea po o le taumafai lea o tagata uma e momotu lea aga ma gaiaoiga ia saoloto mai ai fanau mo le lumanai. Sa taualuga foi le po i siva a le fanau ma taaloga o le Kerisimasi aemaise le pese o le Kerisimasi numera tasi a Tui ET, ‘O le Kerisimasi na mafua ai’ a o faafofoga le atunuu. O le afioga i le taitaifono Muagutututi‘a Vaiolo Siutu na molimolia le faafetai ma tauluga ai le po i se ‘aiga ma se fiafia mo le Kerisimasi.
