Ua tofu atunuu taitasi o le Pasefika e pei o Samoa ma taiala ua faatonutonu ai le galuega faasalalau ma le tautua faatusitala mo nusipepa, leitio, televise, ma lipoti salalau i luga o fesootaiga tau upega tafa‘ilagi.
Peitai o loo iai pea le lagona lē mautonu, ma lagona tetee o nisi o loo faia lenei galuega i le faatuina o ni itutino e faatonutonu ai le galuega, aemaise lava pe a aafia ai ma se faigamalo poo se faaupuga faigofie o le aafia ai o ni faiga faapolokiki.
O Samoa e pei ona iai nisi o tatou lipoti, ua taoto nei i le Palemene se tulafono o le a faatuina ai se itutino e faatonutonuina galuega faasalalau ma tusitala, aemaise o le a filifilia ai ma se laulau latou te faamasinoina ni faaletonu e aafia ai lea tautua tāua.
O le UNESCO ma UNDP o ni vaega o Malo Aufaatasi, aemaise o le UNESCO ua fitoitonu iai le pitolaau o faamatalaga lea ua iai ma le auaunaga e atinae ai le galuega a le aufaasalalau ma tusitala mo atunuu uma o loo i totonu o Malo Aufaatasi.
O le suesuega na faia sa fesiligia ai tusitala ma tagata faasalalau aemaise i latou o faagaioia faasalalauga i soo se auala i atunuu e 12, pe o se tulaga tatau ma talafeagai ona faatuina se itutino e faatonutonuina lenei galuega mo atunuu uma o le Pasefika, ma fausia ai ma se taiala e laugatasia ai le galuega.
O le taunuuga o lea suesuega ua atagia ai le lilifa o lagona faaalia o i latou na fesiligia, i le tatau ona faatu se tulaga faapea, ae sili ona lagolagoina le lelei o le galulue faatasi o le autusitala ma tagata faasalalau ma se faigamalo ae ia lē afaina ai le tutoatasi o lea tautua mai le aafia ai o se malosiaga faapolokiki. O le faiga masani lava o se itutino faapenei e faatuina, e na o tagata faasalalau ma tusitala ma ē o pulea nei auaunaga latou te fausia le taiala (self-regulated) ma faatuina se itutino e faatonutonu ai e aunoa ma le aafia ai fua o se faigamalo.
Peitai ona o le tele o tausaga o faataavalevale le taumafaiga a le faalapotopotoga o tusitala ma le aufaasalalau a Samoa le JAWS e faatatau i lenei fuafuaga, le mafuaaga na faatonu ai loa e le Palemia le ofisa o le Loia sili a le Malo, ina ia fautuaina le komisi mo le toe fuataina o tulafono ina ia faataoto se taiala ma fausia se tulafono e aloaia ai le faatuina o se Media Council, lea o le a pasia i lona faitauga faatolu i le Palemene i le vaiaso nei.
O le iai o se itutino faapea mo galuega a tusitala ma le aufaasalalau i le Pasefika e manatu le UNESCO ma le UNDP o le a mafai ona tutoatasi ai ni galuega e faatino pe a suesueina ni faaletonu e aafia ai le galuega i le tulaga aoaotele.
E ui ina foliga e lilifa le lagona i le tāua o se itutino faapea mo le Pasefika ae ua fautuaina i le suesuega le tatau ona toe faia nisi faatalatalanoaga e faamautu atili ai.
O le tāua o itutino faapenei, o le a tausisia ai e tusitala ma le aufaasalalau le tausisia o taiala o le galuega ina ia ausia ai taiala o pulega lelei poo le good governance.
