O le taeao o le Aso Gafua (29 o Setema) ua lē gata ina faamanatu ai le atoaga o le lima tausaga talu ona aafia Samoa i le tsunami poo le galulolo/galuafi na maliliu ai le toa 143, leiloa le isi toatele e oo mai i le taimi nei e lei maua lava, ae o le aso foi lenei ua faamanatu ai faavaomalo le aso faamanatu o Malu o le Malo poo Leoleo.
E faitau selau leoleo o Samoa na savalia le taulaga o Apia ma agai mai ai mo se sauniga na faamanatu ai lenei aso tāua. O le susuga i le faafeagaiga ia Rev. Fiti Aloalii na taitaia le sauniga lotu e faamamalu ai lenei aso faamanatu.
O se aso lenei ua manatua ai i latou uma i Samoa o loo faia lenei galuega, e tele lava ina faitioina lea tautua ma ua faapea ona oo mai lava i le taimi lenei o loo tele mataupu o loo laga faasaga i leoleo i Samoa nei i lenei vaitaimi.
E le gata ia i latou o loo tautua i lala eseese o le matagaluega o leoleo ae o lea foi ua manatua ai leoleo ua fai i lagi le faigamalaga ma i latou o loo ua faamautu i atunuu mamao i le faalautelega lava o lenei auaunaga faaleoleo.
O le sauniga lenei e lima tusipasi na tuu aloaia atu i faletua o ni leoleo ua maliliu e toalima i lenei sauniga. Faaalia e Fauono Talalelei Tapu le sui Komesina o Leoleo le tāua o lenei auaunaga ma faamanatu i leoleo o le taulaga lenei a soo se alii ma se tamaitai e galue faaleoleo, o le taumafai ina ia ofo atoa le ola ma ia fai le galuega ma le alofa i tagata o le atunuu.
Ua silia i le toa 500 alii ma tamaitai ua tautua faaleoleo i totonu o Samoa lava ia ma na faafetaia e le Sui palemia, le Afioga Tuisugaletaua Sofara Aveau le sao o leoleo aemaise lava i le fono a Malo Tau Atiae o le Lalolagi, le SIDS lea na faatoa mae‘a atu nei.
O le mau a le Sui palemia, e tautala lava galuega e faatino ma o iina e tali atu ai i le tele o faitioga ua aumai i le faatinoga o le galuega a le Matagaluega.
O lana faafetai o le tali mai a leoleo i le fono tele lea na molimauina ai le gasolo lelei o le faatinoga o le puipuiga mo malo faaaloalogia aemaise le puipuiga lautele i soo se itu o Samoa i le taimi o lenei fonotaga.
