“O le ‘ali‘ao, le matapisu ma le gau, o le loli ma le limu aau”…O se vaega o upu o le pese lauiloa a le aufaipese a alii tala‘i poo le au faamisiona mai Amerika sa galulue i Samoa i tausaga e tele ua mavae.
O upu o lea pese e faatatau i taumafa ma figota o le sami i lo tatou atunuu e maua ai le malosi ma ola maloloina pe a taumamafa i ai. Peitai o lea ua molimauina nei e le gata ina tausasami pea lo tatou atunuu i figota eseese o le sami ua tatou masani ai, ae ua aliali mai nei e iai ma seleni e ono maua e le aufaifaiva i le aloalo pe a lelei ona faafailele le figota o le ‘ali‘ao.
O suesuega lata mai a le vaega o le Secretariat of the Pacific Community le SPC, ua iloa ai nei le faateleina o lea figota i ogasami o le aloalo i motu o Upolu ma Savaii.
Ua tatou molimauina le fagotaina e tagata o lea figota ma ua faatau fagu o le aano o le ‘ali‘ao lea e $10 ma le $20 tala i le fagu, ae fai mai le SPC o lona atigi e manaia ona lanu e mafai ona gaosia ai nisi o oloa e pei o faamau mo laei.
O le tausaga e 2009 na aumai ai nisi o ‘ali‘ao mai atunuu e pei o Palau ma faafofoa i gataifale o le atunuu lea la ua toe suesue atu nei, ua vave ona ola ma faateleina ai lea figota i gataifale o le atunuu.
Fai mai le molimau a nisi o faifaiva o le aloalo aemaise o tina o loo fagotaina figota nei e aofia ai le sea, gau, limu fuafua, fugafuga ma loli e maua atu ‘ali‘ao o loo nonofo solo i lalo o ‘amu ma luga o aau.
O le isi foi itu lelei e lē tutusa le ‘ali‘ao ma nisi o figota e pei o fatu‘aua ma tifa e pipii i ‘amu ma seiloga e talepe le ‘amu ona mafai lea ona aveese. O le ‘ali‘ao e na ona ao mai lava ma faotaga ona ave lea i uta aveese ai le aano.
Peitai o le suesuega sa faia e le ofisa o faigafaiva na iloa ai ua lē fagotaina le ‘ali‘ao ma faatau lona aano ae ua lafoai o latou atigi ma ua fai ma moega lelei e nonofo ai uga o le sami.
O le mafuaaga lea o le unaia nei o taumafaiga e faatau ai le atigi i atunuu o le Pasefika e pei o Fiti o loo iai fale gaosi oloa o loo gaosi ai faamau ma isi oloa mai le atigi o lea figota. A manuia taumafaiga nei o le isi lea alagatupe lelei o le a maua e o tatou tagata ma o le a fesoasoani foi i fuafuaga fai a aiga o loo manaomia ai seleni.
