O le Isaraelu moni e susue pea lona faamalama ma vaai i Ierusalema, e ui lava foi ina ua motu mai ma le taula, ae manatua pea faasinomaga. O le Aso Toonai na tuanai atu aso 27 na faamanatu ai e le paia ma le mamalu o le afioaga o Leauvaa o loo afifio ma nopiai i le aai o Melepone, le sulufaga mo Sagato Mikaele e pei ona masani ai mai Samoa.
O le taitai aoao o le Ekalesia Katoliko i Samoa ma Toelau le afioga i le Akiepikopo Alapati Mataeiliga na afio faapitoa mai na te taitaia le sauniga o le Misasa na faia i le malumalu tapuai o le Sacred Heart i le pitonuu o St Albans, pei ona faatinoina ai tulaga masani o le afioga ia Sala Milo Alefosio.
Na ia saunoa e faafeiloai le afio atu o le Tamā o le ekalesia le afioga i le akiepikopo, a o le faatoesega a le afioaga na ifo ai le afioga ia Sala Alesio ma Tuala Mauola, ona molimoli ai lea o le taulaga a Leauvaa ma ufitai i le ie o le malo, mae‘a ona sosoo ai lea ma le taumafataga tele na faia i le hall a le ekalesia o le Holy Eucharist i St Albans lava.
Na matuā faatumulia i tupu ma e‘e faapea tapaau o le afioaga le paia lasilasi seia oo lava i mauga tamatama, aemaise uo ma le mamalu o le valaaulia. Na toia le laulau a Tumua i meaalofa na maau i ai nisi o le valaaulia faapea nisi o faalapotopotoga ma vaega eseese o le ekalesia, o le fofoga o le aso o le fetalaiga ia Tevaga Pili.
Na see mālie le taliina o le sua i le matagofie o faafiafiaga na sausaunoa ai alo ma fanau a le afioaga faapea le aufaipese, na maau foi le paia o le afioaga i faaaloaloga mo le akiepikopo aemaise o le mamalu o le valaaulia i ona tupu ma tamalii, ma faatino ai le pitolaau tauave a le faleupolu o tofiga, ona ta‘ape lea o le fuamanusina ma le viiga sili o le Atua. Ia tupu ma ola le mafutaga, aemaise o le faamasani o alo ma fanau a Leauvaa.
