Faamanatu e le Kolisi o Aotea 51 tausaga o le Tutoatasi ma le Vaiaso o le Gagana Samoa

O le Aso Lulu 29 o Me, i le 12 i le aoauli na aofia potopoto ai matua ma le mamalu o le ‘auvalaaulia i le Maota a le Kolisi o Aotea mo le faamanatuina o le 51 tausaga o le Tutoatasi o Samoa ma le Vaiaso o le Gagana Samoa.
O lenei faamanatuga na amataina lava i se sauniga lotu na taitaia e le Afioga i le Taitaifono o le Matagaluega Perepereane i Ueligitone; Rev. Perema Leasi, a o le Faafeagaiga foi a le Ekalesia a Tagata Atumotu i Porirua (PIPC).
Na mae‘a le sauniga lotu ona saunoa ai lea le Afioga i le Komesina Sili o Samoa ia Leasi Papaalii Tommy Scanlan e faafetaia le valaaulia ma le faatāuaina o lenei vaiaso e le fanau aemaise o mātua. Na ia toe faamamafa foi le tele o le tautua o tagata Samoa i le malo o Niu Sila ma faafetaia foi le lagolago malosi a Niu Sila i tagata Samoa i soo se itu.
Na sosoo ma le saunoaga a le Puleaoga ia Kate Gainsford ma ia faailoa le toatele o tamaiti Samoa i le aoga ma le tāua o le faaaogāina o le Gagana Samoa e tamaiti.
O le susuga ia Dame Susan Devoy o le Komesina o le Ofisa o Aiā Tatau a Tagata (Human Rights Commission) na ia saunoa e faafetaia le faamanatuina o le Gagana Samoa i lenei vaiaso.
Na ia ta‘ua le galuega faifai pea a le latou Ofisa i le faasalalauina o vaiaso o gagana taitasi a soo se atunuu i totonu o Aotearoa ona o la latou anava tausi lea. E lē faapito tasi i se atunuu e tasi ae faapea lava i soo se atunuu o loo i totonu o Niu Sila. Na ia ta‘ua ai foi o le a ia taumafai atili ia aoao lana faasamoa ma ia oo atu i le tausaga fou ua feoloolo.
Na ese foi le tulai mai o faiga felanulanuai a lenei aoga ona sa laei uma tamaitai i puletasi, a o alii na laei a latou iefaitaga ma ua faatāuaina laei faasamoa moni e le fanau.
O a latou faafiafiaga faasamoa moni foi sa faatinoina na nanamu Samoa ai le aso atoa faapea foi ma le fofoga o le aso na faasamoa ma faapalagi le gagana ona o le aofia ai o i latou mai isi atunuu.
Na feulaina ma alaina le keke manaia o le 51 tausaga o le Tutoatasi o Samoa, na saunia e le aoga ma faiaoga ma mātua e le susuga i le Puleaoga ia Kate Gainsford, Komesina Sili le afioga ia Leasi Papaalii Scanlan ma Dame Susan Devoy, le Komesina o le ofisa o Aiā Tatau a Tagata.
Sa faaiu le polokalame matagofie i le taumafataga na saunia e mātua, faiaoga ma le fanau i lea aso. Faamalo atu i mātua ma faiaoga uma o le Kolisi a Aotea ona o le faamaopoopo lelei i le faamanatuina o le Vaiaso o le Gagana Samoa i lenei tausaga.