Malosi polokalame faalauiloa mo le taofia o le ulaula tapaa

Na lolofi atu le toatele o le atunuu i le taulaga faatau i Otara i le Aso Faraile talu ai, aso 31 o Me, ona o le fia faatāua o le tau lagalaga o polokalame sa faalauiloa e nisi o tautua o loo sili ona latou unaia lenei feau taulogologo, ia taofi nei loa le ulaula tapaa e pei ona faatāua ai lea aso i le lalolagi atoa mo le taofia o le ulaula tapaa.
O se polokalame sa taulamua ai tautua faalauiloa mo le soifua maloloina, le South Seas Health Care/Pasifika Smoke-Free Services, le vaega a le Pacific Heartbeat ma le Heart Foundation.
E tele polokalame faalauiloa o loo finauina pea e nei tautua tau le soifua maloloina, i le agaga lava o le fia fesoasoani i tagata o le atunuu aemaise lava i tagata Pasifika, ina ia faatāua nei loa o latou soifua maloloina, e ala i le taumafai e lafoaia pe taofi nei loa se tasi o masaniga leaga, ua avea ma faatauma‘oi i soifua maloloina o le toatele.
Matagofie tapenaga o lea aso, a o folasia le anoano o faalauiloa eseese, ma sa fesoasoani tele foi le aufaigaluega i alii ma tamaitai sa auai e faamalamalama manino i le mamalu o le atunuu na lolofi atu, le tāua o a latou auaunaga o loo fai mo le unaia lava o le soifua maloloina i totonu o aiga, nuu ma le atunuu.
O le susuga ia Sunita Nua sa avea ma fofoga MC o le aso, ae na lagolago malosi i ai ma nisi o alo ua iloga o le atunuu i itu tau taaloga, e pei o le afioga ia Aumua Too Vaega o se tasi o sui iloga o le Manu Samoa.
O isi foi alii iloga i taaloga lakapi e pei o le susuga ia Manu Vatuvei ma Pita Alatini sa faatulaga foi ni a la tautalaga i lena aso, o nisi o faataitaiga lelei o ni alii taaalo malosi, auā e lē ulaula ma tumau ai pea i le soifua maloloina lelei.
Ese mai le faatāua o le taofia o le ulaula tapaa, sa faalauiloa foi i nisi o laulau le tāua o taumafa paleni, sa faaali ai ma nisi o fua e fai ai kuka manogi. Sa iai foi le auaunaga a le Pasifika Ola Lelei lea e uanaia le taofia o taaloga faitupe.