Na faamanatuina le 90 tausaga o le soifua o le tina matua ia Nila Tapu Tino mai Vaiusu, E e pei ona faataunuuina i le maota o le afioga ia Sa‘u Lemana Faalafi Lale ma le faletua ia Fofoga Lale i le Aso Toonai aso 5 o Iulai.
O le susuga ia Rev Andrew Ross o le faafeagaiga o le Ekalesia Uniting Church i Sunny Bank sa amataina i se sauniga lotu puupuu ona alo lea i le faamoemoe.
O se fiafiaga i le tina a o maua le malosi ona o le auai mai o nisi o ona alo le tofa ia Ausage Sefo Tino mai Samoa faapea si ona alo tamaitai o Tina mai Kalaiesetete.
O le tofa ia Ulugia Faauliuli sa fai ma fofoga o le aso. E toalima alo o le tina matua ia Nila e toalua alii ma tamaitai e toatolu. Ua toafā augatupulaga i le taimi nei ua 28 grandchildren ma great-grandchildren na tupuga mai i le tina matua.
Sa auai le ekalesia Sunny Bank Uniting Church, ma o le tofa ia Asiata Sivanila Asiata sa fai ma sui o le ekalesia ma le auvalaaulia e momoli se agaga faafetai e tusa ai ma faaaloaloga aemaise o le taumafataga sa tapenaina lava e alo ma fanau.
Na molimau le faletua ia Fofoga e ese le manaia o le tausi matua e leai se faalogologotina pe la ea o se tina e naunau i se tupe mea e sili i le tausi faamaoni.
O tuaa o le tina matua ia Nila Ulugia Tapu Tino o si ona tina o Siutā Ulugia Taualai (Vaiusu) ao Ti‘a Sililo si ona tama (Falefa).
Alofaaga ma faamanuiaga mo le tina matua ia Nila Tapu Tino i Stretton. E fiafia fai a‘e o matou loto ma vivii a‘e i le Atua ona ua aulia ma le manuia mai le 90 o ou tausaga, o la matou tatalo ia alofa pea le Atua ma tulutului aso ma faaopoopo nisi tausaga se tele mo oe le Tina a o tatou mafuta ai pea.
Alofaaga e lē mavae mai lau fanau: Ausage & Loketi ma le fanau i Samoa; Tina & Faalafi Lemana male fanau (Kalaisetete NZ); Tapuala Setefano & fanau; Ioana & Muele Lei‘ataatimu & fanau; Fofoga & Sa‘u Lemana Faalafi Lale ma le fanau i Brisbane Ausetalia ma le aiga atoa i Samoa, Ausetalia ma Niu Sila.
Ia manuia tele le atoaga o lou 90 tausaga Nila Tapu Tino.
