O le vaiaso na mavae atu nei, na faatautaia ai le sailiga seleni a le afioaga o Saipipi i le motu tele i Salafai e la latou mafutaga i Sini nei auā se faatalauula mai o le paia ma le mamalu o le afioaga i Samoa. O le autu o lenei tusigaigoa auā se galuega o se latou Hall a le EFKS e fia fausia mo taligamalo, mafutaga a le ekalesia ma isi faatasiga a le matagaluega.
O le afioga lava i le taitaifono o le mafutaga i Sini i Ausetalia na faafeiloaia le mamalu o le aofia i le taeao faagasolo ai le lotu amata i le Ekalesia o loo galue ai le lupe faalele o le mafutaga ia Rev Faauuga Siitia o le Uniting Church i Lakemba lea na faatautaia ai lenei faamoemoe. O se nofoaga e masani i ai le atunuu mo faamoemoe faapenei auā e lata atu i nofoaga e pei o Bankstown, Punchbowl faapea le fatu o le taulaga o Sini. Sa auai atu ai foi sui o isi ekalesia e molimoli atu a latou meaalofa auā lenei galuega mo le Ekalesia i Saipipi.
Na auai atu foi le afioga i le Konesula o Samoa le Tofa Manogiamanu Fonoti Etuale Ioane ma le faletua. O le polokalame na faagasolo i le mae‘a o se tatalo amata ma gasolo atu loa matafale, uo ma ē masani ia latou laulausiva a o tali le malu o le taeao. Faatoa malolo lava i le taligasua o le aoauli. O se itu na mataina ai aso faapenei o le faailoaina o piitaga o nisi i le afioaga ma le ekalesia sa logomalie i le faafofoga ma matagofie ai le aso.
Na lamalama faaiu le aso ma taualuga ai loa i le faitauina o le maau ma le milomilosia o le aofia aemaise le aofaiga o se seleni na ausia.
Na faateia le aofia i le mataina o le aofai e $33,000 na faapea ona aoina ma viia ai pea le agalelei ma le lotonuu o le mamalu na auai. O le fetalaiga ia Tofa Leaumoana Winterstein na fai ma sui o le mafutaga na ia momoli le faafetai i le aofia ma taualuga ai loa ma lenei aso faapitoa mo le afioaga i Sini Ausetalia.
