O le faaiuga o le vaiaso ua mavae na taunuu mai ai i laufanua o Aotearoa le au taaalo a tamaitai aoga a le Kolisi o Robert Louis Stevenson mai Samoa. E 64 le aumalaga na malaga mai, e aofia ai le afioga i le tamaitai pule ia Masa Faasau ma faiaoga e toafitu, o mātua e toasefulu ma le au taaalo e 46.
Na taunuu mai lenei faigamalaga ma faamautu i le kolisi o Wesley i aso e lua ma amata ai a latou taaloga e pei ona asia ai laufanua o Aotearoa. E 3 au taaalo a lenei aoga, o le ‘au e i lalo ifo o le 14 tausaga (Under 14) o le 16 tausaga agai lalo (Under 16) ma le au 18 tausaga.
Na mae‘a le latou taaloga ma Wesley ma manumalo ai le au laitiiti 14 tausaga ae malolo au e lua matutua. O le Aso Lulu na agai atu ai i le Ekalesia Faapotopotoga Kerisiano Samoa i Grey Lynn ma mafuta ai i aso e fā, a o le Aso Tofi na faia ai loa le latou taaloga ma Auckland Girls Grammar i le malae o le AMI Netball Court i Mt Wellington; o le iuga o lea taaloga na malolo uma ‘au e tolu a le kolisi o Robert Louis Stevenson.
Ua mae‘a nei taaloga e nei alo o le atunuu e pei ona malaga mai ai, ma o le faaiuga o le vaiaso o le a ta‘ape ai i aiga ma faatalitali ai le aso 12 ma le 13 e toe foi ai i Samoa.
Ae na faaalia le finagalo o le afioga i le tamaitai pule ia Masa Faasau, o le autu o lenei faigamalaga o le taumafai ia faalauiloa le taleni ma le tulaga maualuga ua oo i ai le taumafaiga o alo ma fanau aoga i taaloga, aemaise o le maua o le avanoa e taaalo ai ma au a tamaiti aoga a isi atunuu e ese mai ai i au i totonu o Samoa.
Na ia saunoa foi ua iai nisi o fanau ua mafai ona filifilia i aufili e malaga ma taaalo i atunuu i fafo.
