Na felanulanuai le taulaga o Apia ina ua potopoto sui tuai o le Kalapu a Malisi Sagato Iosefo i le Aso Faraile na tuanai atu nei i le amataga lea o le faamanatuina o le 45 o tausaga talu ona faavae ma tuufaatasia nei kalapu i totonu o Samoa.
O se faamanatuga na valaaulia ai sui tuai uma o le kalapu mai i Samoa nei faapea atunuu i fafo e manatu ai sui na faavae mai nei kalapu aemaise o le tulaga ua iai i le atinae o taaloga aemaise i le lakapi i totonu o le atunuu.
O le solo tele na taunuu i luma o le maota o le Malo i le eleele fou ma faatautaia ai loa se sauniga lotu e faafetaia ai le atoa o nei tausaga e le Malisi Sagato Iosefo ma o le sui Palemia ia Taulafi Selafi Purcell na fai ma sui o le Malo e faafetaia taumafaiga a lenei kalapu.
O Malisi Sagato Iosefo o le kalapu lenei na amata ai le lakapi i Samoa ma o le tuufaatasiga i le tausaga e 1970 na vaaia ai le malosi o le tulai mai o lenei tino i totonu o Samoa auā lava taumafaiga o fanau ina ia atiae lelei le tomai ma le malosi i lenei taaloga.
Ona pau lava foi lenei o le kalapu i Samoa e oo mai i le taimi lenei o loo faagasolo lava lana taamilosaga lakapi taitoafitu i tausaga taitasi ma ua toatele tagata lauiloa o lenei taaloga i le lalolagi ua oo mai i Samoa auā lea taamilosaga tele lea ua ta‘ua nei o le Malisi taitoafitu faavaomalo (Marist International 7s).
O le sauniga i luma o le maota o le Malo na faatino ai ma se tufatufaga faailoga mo i latou uma na velo ‘aso i le atinae ai o le Kalapu a le Malisi ma o le tagata muamua lava na ave i ai lea faaaloalo o le afioga Mamalu i le Ao o le Malo, Tuiatua Tupua Tamasese Efi, o le tama tuai o le Malisi ma na aofia ai foi isi taitai o le atunuu ma pisinisi tuma‘oti ma kamupani e pei o le ACP (Apia Concrete Product) o se tasi o pisinisi o loo pulea e le afioga Tupua Fred Wetzel ua iloga le tulai mai i le lagolagoina o lenei kalapu i totonu o Samoa i le faagasolo mai ai o tausaga.
O le isi tama tuai o le Malisi Sagato Iosefo o loo faaauau ona faauluulu i ai le Lakapi i Samoa nei, o le alii Palemia lea le susuga Tuilaepa Lupesoliai Sailele Malielegaoi, le Taitaifono o le Iuni Lakapi a Samoa.
E lei mafai ona auai le alii Palemia i lea faamanatuga tāua ona o fonotaga a taitai o le Pasefika na faagasolo i le vaiaso na tea nei i le Atu Kuki ae na manatua foi i lenei tufatufaga faailoga ma le Aso Fanau o le Kalapu.
O le Aso Toonai na faatino ai le aso taalo mo le faamanatuga o le aso fanau ma o taaloga o le soka, o le lakapi pa‘i ma le netipolo na faagasolo i le malae o le kalapu i Lotopa ae o se tausinioga o tagapolo na faapea ona faatautaia i le malae tapolo i Tuanaimato.
O se po fiafia na sosoo ai i le afiafi lava o le Aso Toonai i le fale o le kalapu i Lotopa ae o se sauniga lotu na faia i le malumalu Katoliko tele i Mulivai ma faaiu ai lenei faamanatuga taua i se toonai na faia i Lotopa mo sui uma o le Asosi na auai mai i Samoa mo lenei faamoemoe.
Talu lava foi ona tulai mai lenei kalapu ua iloga foi le sao o ana tama taaalo i totonu o le atunuu ma ua tele tausaga o tumutumu le Manu Samoa i tama o lea kalapu na faapea ona avea ma sui o le Manu Samoa i le tele o tausaga. O le faafetai na fofogaina e le Ao o le Malo na manatua uma a i latou nei ma lo latou sao i le kalapu ma ana atinae aemaise foi le sao i le atinae o le lakapi i Samoa nei.
