O le masini fa‘ata ua ta‘ua o le CT Scan lea na faatau mai e le Malo i se nonogatupe a le Matagaluega o le Soifua Maloloina mai le Faalapotopotoga o Taui o Faalavelave Faafuasei i le tau e tasi le miliona limaselau afe tala Samoa, ua amata faaaogā nei.
Peitai o se avega mamafa i le pulega o galuega faalesoifua maloloina le 800 afe tala o le sao lea o le matagaluega mo le totogiina o le nonogatupe.
O le mafuaaga lea na faataalise atu ai se tusi mai le pulega o le soifua maloloina le National Health Services, i tagata faigaluega uma o le matagaluega ma faailoa i ai se leitiofoni saili tupe e fesoasoani ai i le totogiina o le $800,000 o le aitalafu na faatau ai le masini fa‘ata CT Scan fou.
E lei pine ona taunuu le tusi i vaega uma o le matagaluega ae aliali mai i fafo lagona lē fiafia o fomai, tausi soifua, ma tagata faigaluega i vaega eseese o le matagaluega. E lē gata ina faailoa le leitiofoni i le tusi ae na talosagaina ai foi ma se fesoasoani tupe mai tagata faigaluega uma.
“Ou te ofo pe faapefea ona fai lenei faaiuga ae o le pitolaau lea a le matagaluega o le ave o se seleni e togitogi ai le nonogatupe”. Na faataalise atu ni fesili i le alii Pule sili o le auaunga a le soifua maloloina le afioga Leota Lamositele Sio mo se faamaninoga o le leitiofoni.
O le tali a le Pule sili e ui o loo iai auala masani e faatino ai le totogiina o ni fefaatauaiga faapea, ae ua manatu le pulega e saili atu pea se isi fesoasoani i le lautele o le atunuu.
O le tele o faitioga i lenei fuafuaga na toe taotao tua mai ai se isi faasilasilaga faalauaitele mai le pulega o auaunaga faalesoifua maloloina e latalata i le faaiuga o le vaiaso na tea nei a o lei faia le leitiofoni i le Aso Toonai 31 o Oketopa 2015.
O lea faasalalauga na ta‘ua ai le taofia o le faamoemoe ona o nisi o mafuaaga lē ma‘alofia. Peitai ua iai se molimau ua ia faailoa mai o lea faasalalauga mo le taofia o le faamoemoe saili tupe na faatonuina mai le pulega aoao o le Matagaluega o le soifua maloloina ona o se fautuaga mai le Malo.
O le toe faatau mai ai o se CT Scan fou ona ua faaletonu le masini sa iai muamua sa faameaalofa mai e le Malo o Saina. O le mafuaaga lea na toe ave ai gasegase e manaomia ni suesuega atili o o latou gasegase e faia fa‘ata o le CT Scan i Amerika Samoa. O nisi lava gasegase na malaga atu i Niu Sila.
