O le alii o Maeu Nanai Livigisitone ua fai ma faataitaiga mo matua uma i le faatāuaina lea o le faia o tui puipui o a latou fanau i le faatoa faanau mai seia oo i le lima o tausaga.
O lea alii o se Samoa muamua lea na maua lana pine auro i Taaloga a Tupulaga o le Taupulega (Samoa Youth Commonwealth Games) lea na talimalo ai Samoa i le masina na sei mavae atu nei.
I le avea ai o lea alii ma faataitaiga mo tui puipui o tamaiti i Samoa, o loo faapipii ai lona ata i se tasi o faalauiloa a le Matagaluega o le Soifua Maloloina.
O lea faalauiloa o faailoilo mo le Matagaluega aemaise o le Auaunaga Tau Soifua Maloloina, e avea ma faamanatu i matua uma, ina ia faataua le faamaea lelei o tui puipui mo a latou alo.
E le gata o le faamaea lelei o tui puipui mo tamaiti, ae faapea foi i taimi ma aso o loo faatulagaina mo le faatautaia o ia tui puipui, aua le soifua manuia aemaise o le ola tuputupu a’e o soo se tamaititi, ina ia aua nei apoia gofie e faama’i.
O le alii o Maeu i faamaumauga a le Matagaluega o loo maua ai, o se alii na mae’ae’a lelei ona fai ona tui puipui amata mai lava i le faato’a fanau mai seia oo ina atoa lona lima (5) tausaga.
Na maua e lea alii faamanuiaga e ala i se seleni tupe mai le Matagaluega, e faaalia lo latou faagaaeetia, ona o le faamuamua a matua i le faamaea lea ona fai tui puipui o lea alii.
O le Afioga i le Palemia, Susuga Tuilaepa Lupesoliai Dr. Sailele Malielegaoi na ia tauaaoina lea seleni i le alii o Maeu, a o i ai ona matua aemaise o le mamalu o nisi o le Matagaluega na auai e molimauina le faamoemoe.
Na momoli le agaga faafetai o lea alii i le Matagaluega, ona o le amanaia o lona tagata, i le faatauaina lea o le soifua manuia aemaise o le galuega faatino, ina ia mataala ai matua i le faatinoga o tui puipui mo a latou fanau.
O lea alii e 16 tausaga lona matua ma o le a fai ma avefu’a o le polokalame a le Matagaluega mo le atunuu atoa.
E mo le silafia o lea alii sa fai ma avefu’a a Samoa i taaloga e pei ona taua, ma o se alo muamua lea o Samoa na maua se pine auro mo le taaloga o le Siisii Uamea Mamafa.
Ua faagasolo nei le Polokalame a le Matagaluega e ala i le unaia lea o matua, ina ia toaaga e fai tui puipui o a latou alo aua lo latou ola maloloina i le lumanai.
