(SVSG Auckland)
O le faamoemoe o le Dinner of Hope, poo le Taumafataga, lea sa faataunuuina i le hall a le Ekalesia Katoliko i Onehunga i le po o le Aso Toonai, o le sailia lava lea o se seleni auā le fesoasoani i galuega fai a le Toomaga mo ē Puapuagatia i Samoa.
O lea faamoemoe sa maitauina ai le sagisagi fiafia ma le taupati atu o le mamalu o le atunuu ae lē gata i lea o kamupani e lagolago le faamoemoe, faatasi ai ma le afioga i le Minisita o tagata atumotu ia Peseta Sam Lotu Iiga ma lona faletua faapea le peresetene o le Toomaga ia Lina Chang na malaga mai Samoa.
Sa faapea foi ona maua le avanoa e auai mai ai le susuga i le faafeagaiga ia Jeremy Faumuina ma lona faletua o le sui o le Toomaga mai Kalaiesetete. O le afioga ia Patele Anetelea na ia tatalaina lenei polokalame i le tatalo, ma alo ai loa i le taumafataga na saunia e le faleaiga o le Talimanao.
Na faagasolo foi le Se‘i ia i latou uma sa auai i lea po e manumalo ai i ni faailoga na saunia e nisi o kamupni o loo galulue faatasi ma le Toomaga i Aukilani. O se afiafi matagofie tele i tagata matutua sa faatasi atu, ma nisi o uo papae (palagi) sa tuu atu foi lo latou tauau e togi ai se maa mo le Toomaga i Samoa.
O seleni uma lava na maua mai le Dinner of Hope i lea po, e avatu uma i Samoa, auā e manaomia tele e le Toomaga le tatou fesoasoani e lē gata i le tausia o fanau o loo i totonu o le nofoaga, ae o le faatupeina o totogi o le aufaigaluega o loo nafa ma le vaaia o tamaiti.
Ua mafai ona fausia nofoaga mo le fanau, e pei o le House of Dreams, House of Hope ma le House of Blessings i fesoasoani mai fafo. E lē pei Samoa o Niu Sila e faatupe e le malo le tausia o fanau ma tupulaga talavou ua lē mafai ona malupuipuia ma saogalemu i totonu o o latou lava lotoifale.
Atonu ua tatau i le Malo Samoa ona tagai i lea itu, auā o loo faatuputeleina pea sauaga i totonu o aiga, e lē gata i tina ma tamaiti, ae o feusuaiga fai faamalosi ma le matagā o loo faatupulaia pea.
O loo taumafai pea le Toomaga i Aukilani poo le SVSG Auckland e fesoasoani i auala e mafai ona faatino ai le galuega lagolagosua mo Samoa. I lenei tausaga e oo mai i le taimi nei, ua mafai e le Toomaga i Aukilani ona fesoasoani atu i Samoa e lē gata i seleni, ae o lavalava, taumafa, moega pepe, seevae, napekini ma isi lava oloa e aogā mo le tausia o le fanau o loo i lalo o le vaaiga a le Toomaga i Samoa.
O i latou uma i lenei faalapotopotoga poo le mafutaga, ua ofoina (volunteer) atu o latou taimi e faatino ai galuega fesoasoani, e ui ina faigaluega ma aooga ni isi.
O le Afioga ia Peseta Sam Lotu-Iiga o le saunoaga faapitoa lea o lenei faamoemoe ma sa ia faamamafaina lana asiasiga e alu atu i falepuipui ma ia iloa ai le toatele o tagata Samoa o loo i totonu o lenei nofoaga ona o sauaga, ma na ia lapataia ai le tatou atunuu e lē tatau i o tatou tagata ona auai i lea tulaga pe a taofia le lio lea o le sauaga.
Na saunoa foi le Peresetene o le Toomaga mai Samoa, le Afioga ia Muliagatele Siliniu Lina Chang, i le malosi o lea tulaga i Samoa, ma o loo tu‘itu‘i pea Masefau, ma faalauiloa i tagata lautele le sauaga i Samoa.
Ua tufa pepa i avetaavale uma ina ia mataala ma taofia lea tulaga i totonu o aiga, ma na ia taliaina foi le siaki tupe, ua mafai ona maua i lea po.
O le agaga faafetai o le peresetene o le Toomaga i Samoa i le Toomaga i Niu Sila nei ona o le galuega alofa mai le taele o latou loto o loo mafai ai ona maua se fesoasoani mo tatou aiga ma fanau o loo mafatia i Samoa.
Ua mafai foi ona faatino lenei Dinner poo le Taumafataga auā le sailiga seleni, ona o le lagolagosua a nisi o tamalii faipisinisi o le atunuu, faapea nisi o le aufaigaluega paia a le Atua, le paia ma le mamalu o le atunuu.
O kamupani fesoasoani malosi ma sponsors e iai le South Auckland Properties (Taaitulagi Sio Lo Tam), G-Mana Wholesale Autos (Galumalemana Tai Galumalemana), Polynesian Shipping Line (Tupai Susanna Rawson),The Warehouse, faapea ma le Talimanao Catering Services (Faga Siliva-Siilata).
O nisi o aufaigaluega mai matagaluega a le Malo ua lagolagosua i lenei faamoemoe, e iai nisi o Tamaitai Loia Samoa o loo nafa ma galuega tau le fanau i Fale Faamasino i Aukilani, Pacific Ezy Money Transfer, Ministry of Corrections, TAHA Well Pacific Women & Infants of Auckland University, Child Youth & Family-Ministry of Social Development, Labour Party Mangere ma Manurewa, Pacific & International Freight Papatoetoe, Ropeti Ng Shiu ma M &J Ah Fook Distribution Samoa, Strive i Mangere, Salvation Army etc.
Sa momoli mai alofaaga o le Afioga i le Faipule o Magele ma lana foi fesoasoani, le Tofa Su‘a William Sio, ona o loo malaga i Samoa.
O le Komiti mo le tapenaga, o le Faatonu ia Peseta Leva Aati-Schuster, Maria David, Peter Parsons, Jacinta Fidow, Josephine Ngan Woo, Ema Tovia, Traceylee Simi, Kalama Luatutu, ma faatina ia Telesia Sala Tanoai, Losa Ngan Woo ma le Tofa ia Lima Faitasia Aati.
O le Susuga ia Taliaoa Filipo Tipoai le Taitaifono, na saunoa e faafeiloai ma faafetaia le paia ma le mamalu o le au valaaulia. O Fofoga o le po (MCs) o le Afioga ia Tanoai Reupena Tanoai, ma le tausala lalelei o Samoa Janine Tuivaiti, sa pale i le Tausala o Samoa ma le Tausala o le Pasefika 2013/2014.
O le fa‘ili mālie a le Susuga ia Willie Tavita ma ona alo, sa faafiafia i lea po. E avea ai lenei avanoa e faafetaia ai le paia lasilasi ma le mamalu o Samoa i le lagolagosua ma le tapuaiga ua mafai ai ona faatino la latou galuega fesoasoani i le Toomaga mo ē Puapuagatia i Samoa.
