O le aso lenei ua faia e Ieova tatou te olioli ma fiafia ai, o le aso foi ua faia e le Atua e toe tepa ai i tua ma le loto faafetai, ae savali i luma ma le faatuatua e pei ona iai le manulauti o lenei faamoemoe.
O pesega o le agaga vivii a‘e i le Atua ma le faamanū ma le viiga auā o le faamoemoe ua taunuu o le laau lea o le soifua.
Ua mamalu ma maualuga le asō, auā ua fesilafai ai le aufaigaluega totofi a le Atua i ona fata faitaulaga eseese i ona faasinoti e lua i Aikilani, ae lē gata i lea o le mamalu ma le paia o Samoa ua aofaga potopoto e molimauina le aso fanau o le Ekalesia Metotisi i Manukau e pei ona faamanatuiina ai lona 35 tausaga, ae faapea foi i faletua o susuga i faafeagaiga sa mua i malae i le asaina o le gasū o le taeao.
O le susuga i le faafeagaiga malolo manumalo ia Rev Afereti Samuelu ma lona faletua ia Faataitaia o lē sa avea ma peresetene aoao o le Ekalesia Metotisi Samoa i ni tausaga ua mavae sa faapea foi ona auai atu i ai, faatasi ai ma le komesina o faafetauaiga le afioga a Tofaeono Fonoti Iupati Fuatai, sa auai foi le peresetene aoao o le Ekalesia Metotisi palagi ia Rev Tovio Aumua ma lona faletua e patipatia faatasi le alofa o le Atua i totonu o lenei Ekalesia.
O le taulaga o le faafetai ma le viiga o le Atua na mua i ai le polokalame o le taeao, e pei ona avea ai le susuga i le tausi matagaluega o lenei Ekalesia ia Rev Masunu Utumapu ma taitai o le sauniga.
O le tatalo na fofogaina lea e Rev Logopati Mataafa o le Ekalesia Metotisi i Magele, ae o le faitauina o le Tusi Paia na saunia lea e Rev Laupepa Fili. Na sosoo ai ma upu faafeiloai a le taitai o le sauniga mo le mamalu i susuga i faafeagaiga sa auai faapea foi i le mamalu o le auvalaaulia.
O le avanoa foi lea na faaleo ai se lagona faafetai o le susuga i le faafeagaiga ia Rev Masunu Utumapu i nisi o auauna a le Atua sa latou galulue i totonu o lenei tovine i ni tausaga ua alu, e ui lava ua fai i lagi le folauga a nisi o faifeau ae sa vaaia lava sulu o le tino i o latou faletua sa auai fiafia atu i lenei faamoemoe.
Na tolaulauina ai foi susuga i faafeagaiga sa latou tausia lea matagaluega e pei ona iai le faafeagaiga ia Rev Uatoa Nonoa (maliu) ma lona faletua ia Iloga; Rev Paulo Leleisiuao (maliu) ma lona faletua ia Lulu; Rev Seilala Mapusua (maliu) ma lona faletua ia Elenise; Rev Pita Amiomio (maliu) ma lona faletua ia Pule; Rev Kini Ulukini ma lona faletua ia Theresa o loo galulue i Ueligione, ma Rev Masunu Utumapu ma lona faletua ia Senerita o loo tausia le galuega i le taimi nei.
Na saunia e le auso fealofani ni teufugalaau ma ni ula mo i latou ua maliliu. O le tala otooto o le galuega na saunoa i ai le fofoga o le ekalesia le susuga ia Fuifui Lilia, ae o le laugaina o le afioga a le Atua na mānavaina lea e le Ssea o le faasinoti a Niu Sila i Matu ia Rev Oianatai Matale, faatasi ai ma le ootiina o le lipine e lona faletua ia Faapaia Matale. O pese o le sauniga na lagiina lea e le aufaipese a le matagaluega i Manukau.
Mae‘a le sauniga ona malolo lea i le hall Malaefesilafai mo le malu taeao ae faafiafia ai le autalavou, faapea le faagasoloina o soa a matafale ma le faamauina o le maau a le auvalaaulia, o le fofoga o le aso o le susuga ia Fuifui Lilia.
Matagofie le tapenaga a le ekalesia e ala i le taumafataga na fai ma taunuuga o le aso ae faamae‘a ai i faaaloaloga mo le mamalu o le auvalaaulia ma susuga i faafeaaiga sa auai.
Tala Otooto o le Galuega:
O lenei aulotu na afuafua mai i se ala lē taualoa, e ala i le fetufaai ma faasoa i taimi o tiute ma faiva i totonu o se fale faigaluega, ma oo ai lava ina savalia le ala e le tofa ia Finau Leleisiuao ma Ofisa Ioapo o avefeau ia na savalia ni uso ma ni tuafāfine e fai ma faavae o le Ekalesia i Manukau poo Wiri o le uluai igoa lea na faaigoai ai le Ekalesia.
Na talia le savali ma ofo mai ai le soifua o tupu ma ee aemaise foi se tofa o faleupolu ma le aumaga ma o latou taitoalua, ona momoli loa lea o le aveai poo le savali ia Rev Tulimanu Taotua, o le Failautusi o le sinoti i Otara.
O le uluai feiloaiga na faia lea i le 46 Inverell Ave Wiri, na auai le afioga i le Sea, Rev Apelu Tuimaseve, afioga i le peresetene Auuso Fealofani, Sera A Tuimaseve, Failautusi o le sinoti ia Rev Tulimanu Tautua ma lona faletua ia Peivi T Tautua.
O sui o le aulotu tofa ia Finau Leleisiuao, Tuiolo Faletagaloa ma Ofisa Ioapo. E ui ina iai se tau faaletonu o lenei feiloaiga ae sa toe maua le tofa faatoeaina, o le tofa e fetuutuunai ma feliuliuai, auā e tetele a pesega ae tua lava i le oo. O lea ua tafa le finagalo o le tamā o le sinoti e toe tuu mai le lua vaiaso e toe susū mai ai Rev Tulimanu e toe asia le aulotu pe ua mautu fuafuaga e pei ona faatūina auā se lotu i Wiri.
O le tala fiafia e tupu a le Alii ia, e lei uma le lua vaiaso ae toe momoli le isi savali ma logo le fofoga o le Sinoti ina ia toe susū mai se‘i toe feutagai ma matafale o le aulotu fou ma fetuunai ai se aso e faatū ai le lotu.
O le feiloaiga lona lua a le Failautusi a le sinoti ma sui ma ē o le a faavaeina le lotu i Wiri, na faamalieina ai lana silasila ma ia filifilia aloaia ai loa tofiga o le aulotu. Finau Leleisiuao (Failautusi) Tuiolo Faletagaloa (Teutupe).
O le aso 6 o Aperila 1980 o le Aso Sa o le toe tu manumalo o le Keriso mai le Tuugamau na faatūina ai loa le lotu i le hall a le aoga Clover Park School i Otara. Taitai o le sauniga Sea o le sinoti Rev Apelu Tuimaseve, tatalo ma le faitauina o le Tusi Paia o le Failautusi sinoti Rev Tulimanu Tautua.
O le faamalosi a le taitai i lea uluai sauniga, e lē faigofie se galuega tau amata vaganā ua tuu atoa lou soifua ma lou malosi ma le faalagolago i le agaga o le Alii e mafaia ai soo se mea faigata. Na ia faamanuia foi i nei matafale ua ofoina o latou soifua e faaveina le aulotu fou.
O le pese 116 na lagiina e le aufaipese i Otara e fai ma tautinoga ola e ofoina atoa ai lo latou ola e auauna ai i le Atua. E 8 matafale na latou amataina lea aulotu fou. Finau ma Lulu Leleisiuao, Muliaga ma Araisa Felavai, Faivaiga ma Lei, Suesue Seiuli ma Temu Petaia, Tuiolo ma Sivailoa Faletagaloa, Amataga ma Ruta Sailiai, Suti ma Finau faapea ma Ofisa ma Moeva Ioapo.
Aufaigaluega na tausia le galuega:
1980 Rev Uatoa Nonoa ma le faletua ia Iloga Nonoa
1986 Umusa ai le malumalu i Manukau
1987 Siitia Uatoa Nonoa ma lona faletua ae tofia mai ai Rev Paulo Leleisiuao ma le faletua ia Lulu
1990 Fesuiai laau o le faatoaga ma tofia ai Rev Seilala Mapusua ma le faletua ia Elenise Mapusua
1997 Siitia Seilala ma lona aiga ae see mai ia Rev Pita Amiomio ma le faletua ia Pule ma le aiga
1999 Umusa le Malaefesilafai hall
2003 Valauina ai e le Atua Rev Pita Amiomio a o galue pea i Manukau
2004 
Siitia mai i ai Rev Kini Ulukini ma lona faletua ia Theresa ma le aiga
2007 Amata le Palygroup i totonu o Manukau
2009 Amata ona tapena ma fausia le faleaoga mo le aoga amata
2010 Fesuiai le aufaigaluega ma tofia ai Rev Masunu Utumapu ma le faletua ia Senerita ma le aiga e tausia le matagaluega
2011 Tofia Masunu e fai ma Sea o le Sinoti i Aukilani i Matu seia oo mai lava i le taimi nei o loo seei mai pea i le nofoa
