O le vaiaso na se‘i mavae atu nei na aafia ai Sini i le malolosi o savili ma timuga mo aso e tolu lea na lolovaia ma maliliu ai le toafā o tagata matutua i le pitonuu o Dungog i tafatafa o Newcastle.
Ripotia mai o le toatolu lenei o Colin Webb 79, Brian Wilson 72 ma Robin MacDonald 68 sa malelemo ma tafia faatasi ma o latou fale i tafeaga malolosi ma maimau ai o latou soifua. O le isi toatasi o tamaitai mai i Wallis Creek i Maitland sa tafia lana taavale ma malemo ai.
E lei oo mai se tala faanoanoa i se tasi o lo tatou atunuu o Samoa e alala i nofoaga sa aafia na maliliu i lea mala faanatura e ui o loo tapena nei toe sauniga o i latou ua maliliu.
O le pitonuu o Milperra i Moorebank lea e aumau ai tagata Samoa na matuā afaina fale ma aualatele i lologa ma e lua aso o tapunia le auala se‘i maui le vai. O le vaitafe o Georges River lea e ui atu i tafatafa o le fale faatali nofoaafi na pa i vaega maualalo i Milperra ma Newbridge Road.
Na motusia ai feoaiga o taavale mai Bankstown agai mai i Lverpool le ogatotonu o Sini Tele. E tele foi nisi pitonuu na matuā aafia i le faaleagaina o taavale, fale ma pisinisi. I le tolu aso na vaaia ai sauaga a le tau ma timuga na faamalosia ai ma le pitonuu e sefululua (12) o Niu Sa Uelese o pitonuu aupito aafia poo disaster areas.
Sa faalauiloa foi e le Pulenuu faasetete o Mike Baird le faatusa o le aai tele i se nofoaga sa tau ai se taua i aafiaga ma soifua ua maimau. E 300 milimita le maoae o le suatimu i le aso muamua ma o le amataga lea o le siitia maualuga o le suavai ma papa ai vaitafe ma autu i vaega aafia tele.
O le taualaga i Sini na vaai foi le magoto o taavale i magaala lolovaia, fale faatali nofoaafi i Marrickville ma nisi sa matuā tapunia auā ua pei o se aloalo i le sami le loloto sa iai le suavai.
E oo mai i le aso lona tolu le Aso Lulu e tusa ma le 205,000 fale ua motusia le eletise. E sili ma le 110 tagata ua laveai mai i lologa ae ua oo i le 11,100 valaau mo fesoasoani talu mai le Aso Gafua.
O le taimi foi lea ua tusa ma le 19,500 valaau mo inisiua i Niu Sa Uelese ma o loo faatupulia pea i le taimi nei talu ai lenei afā matautia ‘super storm’.
