“E faapefea ona fai lenei teuteuga lē fetaui, O Faleata e aofia ai ma Vaiusu, Vaitele, Toamua se‘i oo i Puipaa, a o lea ua aumai le tuaoi e gata e sau i Lepea ae muta i Vailoa oso loa i Aleisa”.
O se vaega lea o le finagalo o le sui faipule o Faleata i Sisifo le Tofa Lealailepule Rimoni Aiafi, ina ua maua se avanoa e fesiligia ai i le afiafi o le Aso Gafua 20 o Aperila 2015, a o faatali le taimi e feiloai atu ai i le afioga i le Palemia susuga Tuilaepa Lupesoliai Sailele Malielegaoi, faatasi ma nisi o matai o lona itumalo.
O le savali a le faipule o le fia ave o se tuualalo i le taitai o le Malo ina ia ave le teuteuga o le tulafono o faigapalota faasino i le faavaeina o itumalo tu taulaga, i le komiti a le Palemene e toe iloilo ai, a o lei toe tuuina atu i le maota fono e talanoaina ma faia i ai se faaiuga. Na popole ma atuatuvale le faipule ona o le teuteuga tonu lea sa faamoemoe e avatu i se tulaga faanatinati ma pasia loa.
“O le mataupu lenei e tatau ona faia i ai le amiotonu a le Palemene i le usitaia o faiga faatemokarasi o le ave o le avanoa i le atunuu e aumai ai ni o latou finagalo faaalia, ae lē o le faatopelau faapea”.
O le atugaluga foi o Lealailepule o le aafia o aiā tatau o tagata o loo alala i fanua saoloto i Faleata pe a lē ausia le autu na mafua ai ona faataoto e le Malo le faia o ni itumalo tu taulaga i Faleata ma Vaimauga. Ua maua i ni sailiiliga a le tusitala o lenei lipoti se molimau faatuatuaina e faapea, na logotala le Palemia i le vaevaega o loo i le teuteuga e pei ona finauina e le faipule o Faleata i Sisifo, ma ave ai lana tuualalo i le minisita e ana teuteuga le afioga Fiame Naomi Mataafa.
Taaviliga o polokiki i teuteuga mo ni itumalo tu taulaga
“Ua faatolu ona teuteu le tulafono lenei, ae o lea la ua aumai le teuteuga mulimuli ua atagia ai ni taaviliga o polokiki eleelea o loo i tua o le vaevaega o le itumalo tu taulaga o Faleata”, o le finagalo lea o Lealailepule sa ia ta‘ua ai o le soloia o nofoa e lua o le au palota taitoatasi o loo atagia mai ai i le vaevaega o le itumalo tu taulaga o Faleata o loo fua le tuaoi o loo manaomia e le Minisita o le ofisa o le Komesina o faigapalota i tuaoi o itumalo o le au palota taitoatasi.
Peitai e eseese mamao lava ma le autu o le fuafuaga a le Malo faasino i le faatuina o ni itumalo tu taulaga ona o le avanoa lea mo i latou o alala i fanua umia saoloto, ae agai lava tagata o loo alala i elele faaleaganuu i totonu o le Vaimauga ma Faleata e palota i tofi faipule mo itumalo nei i totonu o nuu mavae.
Faaalia e Lealailepule o lona finauina o le lē sa‘o o le vaevaega o le itumalo tu taulaga o Faleata, na faatoa silafia ai e le tasi o faipule o le Vaimauga i Sisifo, o loo lavea ai foi lona itumalo i le faafitauli lava lea e tasi, ae ua ia faafetaia le avatu o le talosaga a Lealailepule o le a mafai ai ona toe faasa‘osa‘o le vaevaega o le itumalo tu taulaga o le Vaimauga.
O le faafetai a le faipule o Faleata i Sisifo i le Palemia ona o le faatuina o le lafo ua lē pasia ai i se tulaga faanatinati teuteuga sa ia finauina, ae ua taatia atu i se komiti a le Palemene e toe iloilo ai.
O le aso 16 o le masina fou o Me o le a toe tauaofia ai le Fono Aoao Faitulafono lea o le a toe talanoaina ai teuteuga o loo taoto pea o le Tulafono o Faigapalota. O le faamoemoe o le Malo ia oo atu i le faigapalota tele o le tausaga fou 2016, ua palotaina tofi faipule o itumalo tu taulaga o le Vaimauga ma Faleata.
