O Rivalana o le uii lea o le fanau a le toeaina ia Rev Elder Leiite Setefano ma le faletua ia Lealofi Setefano o le PIC i Tamaki, lea sa faamanatuina lona 21 tausaga i le po o le Aso Toonai 25 o Iulai i le faleaiga o le Manhattan, o le aso foi lea na atoa i ai lona 21 tausaga.
Na faatumulia le faleaiga i le mamalu o le auvalaaulia i sui o le Ekalesia PIC i Tamaki faapea ana uo netball, ae o le toatele lava o lona aiga i Aukilani.
Sa faapea foi ona malaga mai lona uso ulumatua mai Samoa ia Teuila Vaiao Eteuati ma o ia foi sa fai ma fofoga o le po, aemaise o lona tuagane ia Tapusoa Pouena mai Tahiti na faatasi mai foi ona o le fia molimauina o le aso fanau o le uii a le aiga.
O le sauniga na taitai e le susuga i le aoao mai le PIC Tamaki lava, ia Ieriko Afamasaga o loo aotauina mo le galuega faafaifeau. Ma na faaautu lava lana timaiga ia Rivalana i le tiute tuuoti a le fanau i o latou mātua, e pei ona faia e Ruta ia Naomi.
O le susuga i le toeaina ia Rev Elder Leiite Setefano na ia foaiina le ki i lona afafine, sa faapea foi ona matagofie faafiafiaga na saunia e fanau (grandchildren) a le toeaina aua lava faafiafiaga o le po.
Ona faaiu ai foi lea i tulaga masani o feofoofoaiga ona o le matagofie o le alofa o le Atua. Ma o le tofa ia Avalogo Fainuu na momolia le faafetai a le auvalaaulia i le susuga i le toeaina ma le faletua e tusa ma le matagofie o le aso o Rivalana.
Ona faaiu ai lea i upu faaiu ma le tatalo faamanuia e le toeaina ia Leiite Setefano ma ta‘ape ai le aofia. O Rivalana Setefano ua lua nei tausaga o ave lana course o le Early Childhood ma o loo galue foi o se taitai teine i le ‘au o le Talifa i totonu o le Ekalesia.
