O le taulaga faafetai ma le viiga o le Atua na pepese fiafia ai aiga uo ma ē masani o Andrew ma Angel i le faleaiga o le Happy Days i le Aso Sa ua mavae, e patipatia ai tausaga ua faaopoopoina i o laua soifua.
O le maualuga ma le matagofie o lea mafutaga ina ua tulai le susuga i le toeaina ia Taueva Tosogi mai le Ekalesia Aso Fitu e momoli le upu faamalosi mai le Afioga Paia a le Atua e tapue ma luitau ai le soifua o Andrew ma Angel.
Sa faapea foi ona faaopoopo molimau a mātua o le alii o Andrew ina ia maua pea e ia se olaga manuia ma avea o se talavou e fiafia i le Atua, faatasi ai ma faamanuiaga ma alofaaga o laua aiga mai Samoa, Ausetalia ma Niu Sila nei. O le tatalo a mātua ma aiga ia toe faaopopo e le Atua nisi aso ma nisi tausaga se tele mo i laua auā le feagai ai ma aoaoga.
O faamanuiaga o mātua ia Faiumu Sili ma Iva Faiumu mo Angel i lona 5 tausaga, faapea foi Ioane Vine ma Fialogo Vine mo lo la alo ia Andrew i le atoaga o lona 21 tausaga.
