Na talisapaia e tupu ma tamalii, tapaau ma le mamalu eseese o le afioaga o Afega o loo alala ma papaaao i le aai o Melepone, se tusi na tauaao mai i le afioga a Patele ma le paia o le Ekalesia Katoliko a lo latou afioaga i Samoa, na faatagisia ai so latou aao foai mo le galuega o le toe faafouina o le malumalu o le afioaga.
E ui ina eseese ekalesia o tapuai ma galulue ai le maave eseese o le afioaga, ae na molimauina le fuifui faatasi i le futiafu e tasi ma nutimea faatasi i la latou tausala na faataunuuina i le malu o le ekalesia PIC i le Aso Toonai na tuanai atu.
O le faafeagaiga taulagi o le PIC le susuga ia Simalu Cowley na taitaia le sauniga na amata aloaia ai le faamoemoe, ona alo loa lea i aga masani o aso faapenei. O le komiti faafoe o le mafutaga a le afioaga na nafa lava ma le aso.
O le taitaifono o le susuga ia Fata Tauamoa Sa, o le aao tusitusi o le susuga ia Fata Alofa Fuimaono o le fofoga foi lea o le aso, o le teuoloa o le lupe faalele a le afioaga le susuga i le faafeagaiga ia Vaitimu Faalele Tuafuti, ma le lagolago a le susuga ia Vaotuua Paepae aemaise o le faletua ia Aolele Setali.
Na maitauina le tele o tausala lalelei na sausaunoa ma saasaa e faaali le agaga lagolago i le faamoemoe.
Na mae‘a le taumafataga ma nisi o siva na totoe, ona alo lea o le mafutaga i faaaloaloga mo le aufaigaluega paia, faatasi ma le pitolaau a le faleupolu e pei ona fai ai le fofoga o Seve Naseli ma sui o le valaaulia ma Samoa na potopoto.
E silia i le tolusefulu afe tala le seleni na faaalia ai le aao mafola o Melepone. Ia sagai ane ‘ai o le tai mo le mafutaga a le afioaga.
