O faanaunautaiga o mātua faatasi ma a latou tatalo ina ia aogā alo ma a latou fanau mo le finagalo o le Atua, o se fiafiaga sili lea i le finagalo o le afioga ia Seve Tafatoa ina ua valaauina si ona alo o Tausagafou mo le galuega tala‘i.
O le mae‘a mai ai o lona valaauina, lea na aofia potopoto ai ona aiga, lana Ekalesia ma ana uo ma aumea mamae i le Aso Toonai na tea nei, e sii faatasi le viiga o le Tamā o i le Lagi ma fiafia faatasi i le faamanatuina o lona aso soifua, ua atoa ai lona 21 tausaga.
O le sauniga lotu na taitaia e Bishop Sauvao, sosoo ai ma le taumafataga tele felanulanuai a o faagasolo fiafiaga mālie ma le matagofie na saunia e ona aiga ma lana Ekalesia. O le fofoga o le aso na feagai ma le afioga ia Tofilau Sapati, a o le musika mālie na faafoeina e DJ Peter.
O le fofoga o Fiu Kaio Galuega na fai ma sui o le valaaulia e faafetaia le aiga alii mo faaaloaloga, ma ta‘ape ai ma le mama ua lomi. Manuia lou aso soifua Tausagafou, ma ia foai e le Atua nisi tausaga se tele mo oe le atalii. Alofaaga mai lou tamā pele o Seve ma lou aiga atoa i Melepone.
