E sili i le to‘a selau le aufaipese o le Ola Toe Fuata‘ina poo le aufaipese a alii ma tamaitai o loo nofosala i le toese i Tafaigata na latou peseina viiga o le sauniga lotu e talosia ai ma amatalia ai foi polokalame o le faamanatuina o le 52 tausaga o le Tutoatasi o le atunuu o lenei tausaga.
O siufofoga mālie o le aufaipese na tau fai ofo ai le toatele sa auai i le sauniga lotu sa faia i le afiafi o le Aso Sa, aso 1 Iuni i le malumalu fou ua faaulufale nei o le ekalesia Katoliko i Mulivai i Apia.
O le taitaifono o le fono a ekalesia soofaatasi le susuga Kasiano Leaupepe sa taitaia le sauniga na auai atu i ai le afioga i le Ao o le Malo ma ma lana masiofo, o le Lutena Kovana o le faigamalo a Amerika Samoa, le Palemia ma le Kapeneta o sui mamalu o le Palemene ma le toatele sa faatumulia ai le malumalu o Maria Imakulata.
O le Aso Sa foi lea ua faamauina i le tele o sauniga lotu sa faia i le malumalu lea na taualuga i le lotu o le Sisigafu‘a i le afiafipo. O le Aso La o le sauniga masani i le malae i Tiafau Mulinuu e pei o le sisina o le Fu‘a, le malelega faamanuia a le afioga i le Ao Mamalu o le Malo le afioga Tuiatua tupua Tamasese Efi, ona faaiu lea i savali faaaloalo a aoga ma faalapotopotoga eseese i le atunuu aemaise foi o matagaluega ma faalapotopotoga a le Malo.
O le aoauli o faafiafiaga na tatala e le ausiva toatele a le kamupani o le Bluesky i Amerika Samoa ma Samoa nei.
