Na tapisa aiga na lua i le taeao po o le Aso Toonai na tuanai atu ma sagisagi fiafia i le alafa‘i ane i le aso fou. Ua moni ai upu o le tasi viiga, sa moe manatu i feau, lenei ua ala e tatau, ua tatau ai le viiga o le Tapaau sili auā ua uma le faitau masina, mae‘a le faitau vaiaso ma aso, a o lea ua aumai le soifua manuia o aiga na lua aemaise o le ulugalii fou i le aso ma le itula sa tuupoina i finagalo ma talosaga molia e osia ai la laua feagaiaga o le alofa, ma avea ai ma tino e tasi.
O le malumalu o le Ekalesia Anglican i Hoppers Crossing na osia ai a la tautoga ma faamaulu ai faailoga tauave o le alofa ua moni o mama faaipoipo ia i o la tamatamailima, ae molimau le valaaulia ma o la aiga, aemaise o sui vaaia o le Atua.
Se tamaitai foi ina a lalelei o Talitua, ae o le malualii foi o le susuga ia Pale, na atili susulu lo la lalelei faatasi ma a la uosili ma aumea mamae ina ua laulaututu le aofia ae faaulufale i le maota o fiafiaga le Anzano Social Club i le pitonuu o Altona, o ina na tali ai le sua ma taumamafa le aofia ma Samoa na potopoto, ma usi le silamaimoa a o faafiafia le anoanoai o ausiva mai setete eseese o Ausetalia.
Na mamalu naua lo la Aso tele ona o le tapuaiga a lupe faalele a aiga na lua ma le aufaigaluega paia, aemaise o tuaa sinasina, tupu ma tamalii ma le mamalu o le valaaulia na faatumulia ai le malu, o pelega lava o aiga aemaise o le faaalia o le valevale alofa o mea nei o aiga.
O le aso ua ula, auā o lea ua tinipao le uto, ua maualuga le viiga o le silisiliese, ina ua tau lau o le faamoemoe, ta‘ape fiafia le mamalu o Samoa ma le faamanū ma le faafetai. Manuia le aiga fou Pale ma Tua!
