O tulaga lelei i le pulega o le kamupani vaalele o le Polenisia i le maua o ana tupe mamā a o avea le susuga Tauā Fatu Tielu ma Pule Sili, o le a faaauauina e se tasi o tamalii o le atunuu o le a sui tulaga ma avea ma Pule Sili fou le susuga Seiuli Alvin Tuala, o se alo e faasino i le alii fomai ua tuumalo, le afioga Dr Tuala Misi ma le faletua o Aruna.
O se feiloaiga puupuu ma Seiuli na ia faailoa mai ai lona sauni e tauave ona tiute i lana galuega fou.
O se alo ma se tamafanau a Samoa ua tele sona tomai ma silafia i galuega tau vaalele sivili e pei ona sa avea ma pule o mataupu tau vaalele sivili a le Pasefika le PASO i Vanuatu o loo iai le ofisa tutotonu.
Na mae‘a lea tautua ona galue lea i le vaega o fesootaiga tau vaalele sivili i Amerika Samoa ma avea ai foi ma Loia Sili lagolago mo le faigamalo a Tutuila ma Manu‘a lea o le a ia tuua ae see mai e galue i le Polenisia.
Fai mai Seiuli e lei faigofie lana filifiliga peitai o lona naunautaiga lava ia toe foi i Samoa e galue ai ma faaaogā i ai lona tomai ma le silafia.
E lē tau fesiligia o se filifiliga tāua lenei ua faafiafiaina ai le Malo Tutoatasi o Samoa ona ua faaaogā pea ana tamafanau ua aoaoina ma maua faailoga maualuluga i le pulea o galuega ma tautua eseese i lo tatou atunuu. O Seiuli Alvin Tuala e mai se aiga e tele ai tomai faapitoa e pei ona avea lona uso, Susuga Papalii Siaki Tuala ma loia, faapea lo la tuafafine e toatasi lea na filifilia talu ai nei e avea ma se tasi o tamaitai faamasino le afioga Leilani Tuala-Warren.
O lona tina le faletua o Aruna Tuala Misi o loo galue nei i le Iunivesite Aoao a Samoa, ae o se tamaitai sa galue i le tele o tausaga i auaunaga tau vaalele mo le tautuaina o pasese e faimalaga i atunuu eseese o le lalolagi.
O lona tamā le afioga Dr Tuala Misi o se fomai mo oloa poo nifo e lausilafia e le atunuu ona o le tele o tausaga sa tautua ai o ia i le Matagaluega o le Soifua Maloloina.
O le masina fou ua faamoemoe e amata aloaia ai Seiuli Alvin i lana galuega fou, ma e lē taumate o loo nofo sauni foi le aufaigaluega ma le Komiti Faatonu o loo taitaifono ai le susuga Fepuleai George Fepuleai, e faafeiloai le Pule Sili fou.
Talu ona aveese le isi itutino o le Polenisia lea ua faaipoipo ai ma le Virgin Australia mo malaga i le va o Samoa ma Niu Sila ma Ausetalia, ae tuu ese ma le Polenisia o loo faia malaga i le va o Apia ma Pago Pago, ua lē toe tele ni miliona a le atunuu e faaalu i le faagaioia o lana kamupani vaalele.
O le tolu tausaga ua mavae sa maua e le Polenisia ni tupe faasili i lana auaunaga i le malaevaalele i Faleolo ma Fagalii faapea ana malaga i le va o Apia ma Pago Pago.
