Ua mae‘a nei le faiga filifiliga mo sē na te toe faaauauina le taitaina o le galuega a le ekalesia AOG i Samoa ma ua toe autasi ai foi le komiti ma le vasega o faafeagaiga e toe tofia le susuga i le faafeagaiga ia Joe Amosa e taitaia le galuega.
O le faafeagaiga ia Joe Amosa o loo tausia le ekalesia i Iva i le Faasaleleaga, ma o loo faiaoga foi i le aoga Tusi Paia a le Ierusalema Fou i Savaii. O le tele o ana aoaoga i le Tusi Paia o loo maimoa ai le atunuu i luga o le TV i Samoa faapea le polokalame o le Areto o le Ola o loo faafofoga ai le atunuu i luga o le RadioSamoa i Niu Sila nei.
O le tofia ai o le faafeagaiga e faaauau lona tofi taitai i Samoa, na fesiligia ai e le tusitala a le Samoa Times le susuga i le faafeagaiga pe sa faigofie lona taliaina o lenei valaau ona o lea ua leai sona faletua la te vaavaalua i le galuega?
Ae na saunoa le susuga ia Joe Amosa sa faigofie ona talia le faaiuga auā o le olaga ua tuuina atu i le Alii, ma ua tele foi lona valaauina mai le Atua, e ese mai isi tausaga na taitai ai le susuga i le faafeagaiga ia Tavita Pagaialii, na fetalai atu ai le Atua ia te ia e galue e fai ma sui taitai, a o le tausaga 2012 na avatu ai e le Atua i lona loto, “E aua le fia lelei, e lē o oe e ona le galuega, O a‘u e ona le galuega, Tuu mai pea ia te au e faia le filifiliga, ma o le mafuaga foi lena na ave ai lona igoa i totonu o le palota, o lea foi la ua oo mai i le tausaga lenei e lei suia lava le mea na aumaia e le Atua na te tauaveina pea le tofi taitai. Ae na ta‘ua foi e le faafeagaiga upu a Iesu, e aua ne‘i aliitai, ae o le avanoa e auauna ai, ma o le mafuaaga foi lena e fiafia ai e faaauau le tofi taitai auā e tautua ai mo le Alii. O le eseesega o lona galue ai i le tofi i le taimi a o soifua le tina ma le taimi nei, o aso la a o iai le faletua sa tapena lelei mea uma pe a alu se malaga ma faamaopoopo lelei lavalava. Sa faamafanafana foi ia te ia pe a iai ni mea e tutupu i fonotaga a le komiti, a o le taimi nei ua na o le uma lava o se sauniga ma tuu solo lavalava.
O le isi vaega tāua ia te ia ina ua leai sona toalua ua tele ai lona faalagolago i le Atua; e ui ina faanoanoa i le mafutaga i le tino nei ae ua mafanafana ai le mafutaga ma le Alii. Na ia ta‘ua foi, o le galuega i le taimi nei, “e faigata ae suamalie.” O lona uiga e faigata ona o le vaaiga i le tino, auā fai mai le poto o Solomona e sili le toalua nai lo le toatasi, auā e tele le mafanafana pe a moe, e iai foi le tagata e faatūina pe a pa‘ū.
Ae ui i lea e lē avea le maliu o lo‘u toalua ma mea ou te faanoanoa ai e pei o se tagata ua leai se faamoemoe. Auā o tatou o tagata valaauina, e tatau ona faaauau le galuega ua aumai e le Atua ia i tatou. Na ia saunoa foi o le galuega a le Atua e ‘Faia Pea.’