O le Aso Sa, aso 22 o Me na faamanatuina ai le 21 tausaga o le tamaitai o Kaylene Euese. O nai ona mātua o le afioga ia Vaoga Pelenitaga Euese mai Faiaai ma le faletua ia Leata Euese mai Salelavalu.
O le susuga i le taitai aoao o le ekalesia Aso Fitu Samoa Tutoatasi le susuga ia Pr Lagolago Levae mai Falelatai, sa folafolaina se upu auā le soifua tuputupu a‘e o le tamaitai o Kaylene.
Na molimau le tuaa o Kaylene le afioga ia Vaoga Pelenitaga, ua ia tausami ua ia ma‘ona i le tausiga a si a la tama ona o se tamaitai usitai ma faalogo. E faatāuaina le loto alofa o lea foi talavou ona na te lē uuina lana card e tuuina uma lona totogi i ona mātua auā le faasoa mo le aiga. O loo galue le tamaitai o Kaylene i le Australia Post i Brisbane.
Na faatumulia i le ekalesia faapea aiga ma uo na malaga mamao mai lava i Niu Sila ma Samoa, ma totonu lava foi o Ausetalia.
Ia manuia tele lou 21 tausaga Kaylene! Mai ou aiga uma faapea ou mātua Leata ma Vaoga faapea uso ma tuagane.
