“A o le alofa o Ieova, e mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau.” (Salamo 103:17) O lagona fiafia ma saafiafiga o le aiga ma le nofoaalo faapea fanau a fanau, e faafoi ai le viiga i le Atua ona ua mafai ona aulia e si o latou tina matua lona 80 tausaga, e pei ona faamanatuina i le Aso Sa, aso 29 o Me, 2011.
Sa matuā faatumulia le faleaiga i le aai o Sunnybank i le Ekalesia Aso Fitu o le Toe Afio Mai i Logan City faapea aiga uma e faailoa lo latou agaga fiafia e tusa ma galuega lelei a le tina.
O lea toe ulutaia o le atunuu o lona alaafaga o Samatau, a o le alalafaga o le tamā o le aiga o Malaga Mikaio Tuimaseve o Faleula, ua failagi lana folauga.
O le keke e fogafale valu o le aofai lea o le nofoaalo a le tina matua. Sa taitaia lea sauniga faamanuia e le susuga i le faafeagaiga ia Pr Ieti Ah Siu o le Ekalesia Aso Fitu o le Toe Afio Mai i Logan.
O le susuga ia Malaga Rocky Mikaio sa fai ma fofoga o le aso, a o le tofa ia Lavea Vaovasa Tuimaseve sa feagai ma isi vaega tāua o le aso e pei o faaaloaloga auā faafeagaiga ma le auvalaaulia.
E molimoli atu ai alofaaga ma faamanuiaga mo le atoaga o le 80 tausaga o le tina matua ia Aitaua Tuimaseve mai ou aiga uma ma le Ekalesia Aso Fitu o le Toe Afio Mai i Logan City, silisili mai lau fanau uma i Ausetalia, Samoa ma Niu Sila, faapea a latou fanau, ma i latou uma lava na tupuga mai ia te oe Tinā. Manuia tele lou aso soifua Aitaua Tuimaseve!
