O le vaveao o le Aso Sa, 12 o Iuni 2011 a o tofafa le aiga o Feiloa‘iga John Peters i Vaitele-tai na faafuasei ona feala i luga i se malamalama uigaese ma le manogi namu meamu e sau mai le vaega pito i luma o le fale o loo iai le faapaologa.
E taunuu atu le tusitala ina ua logotala i le faalavelave, o loo iai alii leoleo e toalua mo le faia o suesuega.
Na faamatala ma le popole toe fefe le tina o Feiloa‘iga i lea vaaiga aemaise o se gaioiga ua faia e se tagata e foliga sa iai se faamoemoe e susunu lo latou fale. O le faamalu sa i luga o le moega laupapa i le faapologa e tu i le tulimanu ua malala ma ua lē toe aoga.
O lalo ifo i le kapeta ua mu nisi vaega ina ua aafia i le afi. Peitai na faafetaia e le tina le vave iloa o le faalavelave semanu e mu atoa lo latou fale o loo latou mau ai ma si ona tina ua matua ua lata i le 90 tausaga o lona soifua.
O le isi vaega o le fale na taumafai le tagata e susunu, o le teuteu o le faitotoa toso tioata poo le sliding door. Na mu na o se vaega. “Ai na tuai loa ona mu le teuteu o le faitotoa, taamilo atu loa susunu le faamalū”, o le faamatalaga lea a le tina ma lūlū lona ulu, i lona lē talitonu e tulai mai se faalavelave faapea i lona aiga.
E tele masalosaloga ae o loo faalagolago uma lava le maua o le tali i se tagata poo ni tagata na faia lea gaioiga solitulafono, i suesuega a leoleo. E lē mamao tele lava le vaega o loo iai le fale o le tina, ma le fanua o loo iai le ofisa o le SUNGO poo le Faamalu o Faalapotopotoga Tuma‘oti i Samoa. O le po o le Aso Gafua na sosoo ma le Aso Sa lea na tau susunu ai le fale o sia aiga, na osofai ai foi e se tagata le ofisa o le SUNGO ma gaoi se masini komepiuta Laptop.
“Na o mai leoleo suesue ma o loo matou faatali foi i se tali”, o le faamatalaga lea a le Pule Sili o le faalapotopotoga le faletua o Roina Vavatau ina ua talanoa atu i ai i le gaoia o le latou ofisa.
Fai mai le Pule Sili, e leai se faamalama na toesea pe se‘i ese ae leiloa pe faapefea ona gaoia le Laptop. Na saili foi e leoleo tulagalima i tioata poo luva o le ofisa ae leai foi.
O le molimau a se tasi o le pitonuu na tulai mai ai ia gaioiga solitulafono, e fou ia tulaga ua aliali mai. O loo iai le talitonuga ua toatele tupulaga eseese ua vaaia i lea vaega o Vaitele-tai, ua fou ai foi ma ia mea ua tutupu mai ai.
E lei maua se finagalo o le Komesina o le Matagaluega o Leoleo e tusa ai o se taunuuga o suesuega i ia mataupu e lua. Peitai o le feiloaiga a le Komesina ma tusitala na ia faailoa ai le maualuga tele o solitulafono o le talepe fale ma le gaoi na lipoti atu i le ofisa fou o leoleo i Tuanaimato.
E tusa ma le 70 ni mataupu faapea sa lipotia i leoleo i le va o le aso 6 o Iuni e oo i le aso 12 o Iuni 2011. O fautuaga a leoleo i le atunuu aemaise o aiga o alaala i fanua faatau ma fanua lisi i Vaitele atoa, ia mataala i le vaaia lelei o a latou meatotino ma fale.
Ua tolu vaiaso talu ona amata le polokalame fou a leoleo i nisi o vaega o Vaitele-fou lea ua galulue faatasi ai aiga e vaavaai a latou meatotino, ma solitulafono e tutupu ma aliali mai. Ua ta‘ua lea polokalame o le ‘Malu i ou Tuaoi’.
