O le mae‘a mai o le vaalauina faamisiona o le alii o Les Fiu Laufia mo le lua tausaga i le aai o Sini, na faamanatu faatasi ai ma le atoaga o lona 21 tausaga. O le susuga ia Bishop Matuauto na taitaia le sauniga, faatasi ma le lagolagosua a Bishop Davit ma Bishop Fiu Talosaga.
Ona saunoaina ai lea o le faamanuiaga mo lona soifua e si ona tuaa sinasina ia Leauta Iosua Fiu, tauaao ai lea o le ki ma feula le keke, ona faagasolo ai lea o le taumafataga tele mo lona aso fiafia.
E matagofie faafiafiaga na saunia e nai ona tauaiga a o tali le sua a le aufaigaluega ma le mamalu o le valaaulia ma Samoa na potopoto. E matagofie le talaaga o lona soifua tuputupu a‘e; o upu a le Tusi, o ala o le tama amiotonu e faatonuina e Ieova.
Ia tumau lou tausaafia ma le agaalofa, ma ia faatonu folau le Matai sili i ou ala uma. O alofaaga ma faamanuiaga mai ou mātua peleina o Fiu Laufia ma Agalelei, nai ou tauaiga ma tausoga uma lava i Melepone aemaise o lau Ekalesia pele. Ia manuia lou ola tautua mo le Atua. Happy 21st Les!
