Ua felanulanuai ma matagofie le aso mo le faaulufalega o le Fale Tapuai o Tafagamanu ina ua felafolafoai tootoo o le aso i le Gagana Samoa, e lē gata i lea o le faatumulia foi i le au valaaulia, uo o aiga ma le toatele lava o tagata asiasi mo le tatalaina o lea faamoemoe.
O le ekalesia lenei i Tafagamanu o le ekalesia fou lea ua faaopoopo i le aiga lotu a le EFKS. Ua tolu tausaga talu ona motu ese sui o le aulotu fou lenei mai i le Ekalesia Faapotopotoga Kerisiano Samoa i Savaia ona o le manaoga o tamā o lea itu o Lefaga ia faatumau pea faavae o Tafagamanu o se nuu mavae o le itumalo ae lē o se vaega poo se pitonuu o Savaia e pei ona toatele nisi sa faapea o le faatulagaga lea o lea afioaga.
O le oese la o nei sui o le aulotu a Savaia na faavae ai loa ma le latou aulotu ma na vave ona fausia le maota o le Ekalesia ma le maota o le faafeagaiga, saili ai loa ma le latou faifeau.
O le susuga Toosavili Tu‘a faapea le faletua ia Epenesa lea ua tausia le ekalesia ma o totonu la o le tolu tausaga lea ua faatuina ai ma le malumalu o le ekalesia ona o le manaoga lava o tamā o le ekalesia ina ia vave fausia se malumalu e faamautu ai galuega a le ekalesia.
O se faafetai tele lea a le Taitai o le EFKS le susuga Rev. Elder Tautiaga Senara, na auai atu i le molimauina o le Faaulufalega o le malumalu o le ekalesia ona o le laitiiti o le aulotu, ae lē gata i lea o le fou foi ae o lea ua tulai mai ana galuega tetele nei.
O le faafetai ona o le alolofa ane o tamā o le ekalesia i le fanua lea ua fausia atoa ai galuega a le Ekalesia ma le lava papale i le utiuti o le faasoa ae o lea ua tulai mai lenei galuega.
O sui lava o le ekalesia na fausia le galuega ma le fesoasoani tele mai i le ekalesia Metotisi o le afioaga i le susuga Rev. Livi ma le faletua ia Luana ma le aulotu i lea itu o le afioaga na pulupululima faatasi auā le tino mai o le galuega.
E mae‘a le galuega e sili laitiiti atu i le $100,000 (tala Samoa) le aitalafu a le aulotu i kamupani na sau ai meaafale mo le faatinoga o le galuega tele ma e mae‘a le posiva, o taalolo ma le valaaulia ua tusa ma le $195,000 le tupe na alu ma o le faafetai lea a Tafagamanu i lana aulotu lea ona o lea ua mautinoa ua amata sauniga ae ua mamā aitalafu na feagai ma le aulotu aemaise o le totogi o le au kamuta ma isi manaoga ua iai nei le seleni e faatupe ai.
O le aufaipese a le EFKS a Magiagi le nuu o le faafeagaiga, le EFKS a Faatoia ma le Metotisi a Tafagamanu na faapea ona usuina viiga o le sauniga e tatala ai lenei malumalu ma o se aso na tumutumu ai sui o le afioaga, sui o le ekalesia aemaise uo ma aiga i le molimauina. O le fausiga o le faletapuai sa tagi lava i lima o le susuga le faafeagaia ia Toosavili Tua ma le faletua atoa ai ma le ekalesia.
Ua tino le Olo Tapuai ua leva ona moemiti i ai le afioaga ma o le a faaaogā tatau foi lea faletapuai auā sauniga a Tafagamanu. E $20,000 tala Samoa le meaalofa a le Ekalesia i le aulotu ma le fautuaga e pei foi ona agiga i le taimi atoa o faaaloaloga ma le fiafia o lenei galuega, ia aogā le malumalu ma ia galulue loa mo le faasaoina o agaga o le nuu lea ua iai le malumalu tapuai.
