Ua faatulaga e le Faamasinoga Maualuga a le atunuu, o le vaiaso e amatalia i le aso 30 o Mati o le tausaga fou 2015, o le a suesueina ai molimau a leoleo i moliaga e lua o le faaoo o le maliu, ma le susunu fale o loo molia ai Elisara Toetu, o Fogapoa i Savaii, o se taulealea 23 tausaga le matua.
E mafua ona o le maliu o se tamaitai talavou, o le tausoga o lē ua molia, ona o le faalavelave lea na mu ai se fale o se aiga i Nuu. Sa talosaga lana loia e tatala i tua le taulealea mai le vaaiga a leoleo o loo taofia ai i le falepuipui i ni aiaiga, ona ua mae‘a ona faia se leleiga.
Na faailoa foi e lana loia o le a mafai ona nofo o ia i se tasi o lona aiga, peitai ua teena le talosaga ae talia e le faamasinoga le tetee a le itu a leoleo e tatala i tua, ona e lei maua e leoleo se faamaoniga o se leleiga ua faia ma le malu puipuia o le alii pe a nofo i se tasi o ona uncle.
Ua fautuaina ai e le faamasino sili le afioga Patu Tiavaasue Falefatu le loia a Elisara e toe silasila i le talosaga ona e mafai ona toe tuuina atu i se taimi pe a mae‘a ona soalaupule nisi o vaega e tatau ona silasila toto‘a i ai.
Na faaalia e le tamatai loia o loo tulai mo le itu a leoleo o Rexona Tupuse Titi, e iai isi moliaga o loo molia ai Elisara peitai sa lē mafai ona ia faailoa poo ā ia moliaga. O le alii o Elisara o loo tuuaia i le faalavelave ona o loo iai molimau o ia sa iai faatasi ma lē ua maliu i le fale i le taimi na mu ai.
O le a iloa tonu le mea na tupu pe a oo ina tulai le alii mo le suesueina o molimau a leoleo, ma fofogaina ai foi ni ana molimau e lagolago ai lana tetee. I se tasi o mataupu i le Faamasinoga Maualuga, ua tuuina atu e le tamaitai leoleo o loo faamalolo lē tumau o Gorreti Fidow e ala i lana loia, lana tetee i ona moliaga e lua. O ni moliaga e fesootai ma se taavale a le matagaluega o leoleo na aafia i se faalavelave i le masina o Setema o le tausaga nei ma o le tamaitai leoleo na aveina le taavale.
O le moliaga o le ave taavale faatalalē poo le reckless driving ma le moliaga o le ave taavale matautia o loo molia ai le tamaitai leoleo. O le reckless driving e fitu tausaga le maualuga o le faasalaga i le falepuipui, a o le dangerous driving e lima tausaga. O le vaiaso e amatalia i le aso 27 o Aperila o le tausaga fou 2015 e valaau ai molimau a leoleo ma molimau a lē ua molia. O le alii loia o Donald Kerslake o loo tulai mo Gorreti Fidow.
