‘A oo le poto i lou loto e faafeao oe e le atamai.’ ‘A mae‘a foi se galuega lelei ona e fai ona faapea ane lea ua na o se auauna lē aoga a‘u.’
O le afiafi o le Aso Lulu na se‘i mavae atu nei na faataunuuina ai se faauuga tele a le Royal Melbourne Institute of Technology (RMIT) i le malae taalo a le Etihad Stadium.
O lenei faauuga tele e silia ma le 2,000 i latou sa auai, e lē gata i le lagolago a mātua, uo ma ē masani, ae faapea foi le au faauu i faailoga faapitoa, tipiloma, ma tusipasi eseese.
Na aofia ai ma ni alo Samoa i le anoanoai na faauuina, o alo o le susuga ia Luki Tavita mai le afioaga o Salelavalu le alii o Luki Junior Tavita, o lē na faamanuiaina i le faailoga o le Bachelor of Social Science (Legal and Dispute Studies), faapea si ona uso ia Nevada Tavita i le faailoga o le Bachelor of Biomedical Science (Laboratory Medicine Honours) (Honours Class 2A).
Faaalia e Luki, e ui ina ua faiilagi le folauga a le tina, peitai e lei faavaivai ai lana faamalosiau i ona faiva faamatua o le tulei o le fanau ia fai le mea sili. Saunoa Luki na matagofie naua le faamoemoe o nai ona alo ona o le lagolago a nisi o ona tauaiga sa malaga mamao mai Amerika, ma isi setete o Ausetalia. Ua tatala e le Atua faitotoa o manuia mo le lumanai.
