E lē toatele ni Samoa o afifio ma papaaao i lenei tamai aai o Newcastle i Ausetalia, ae ua filifilia mai ai lava le tamaitai o Fusi Alama Amosa Slade mai le to‘a 150 o i latou na tauva i lenei faailoga poo le taui maualuga ma maoae i le soifua galulue o i latou i totonu o le Ofisa o Leoleo i lenei Setete o NSW.
O se taimi muamua lenei ua filifilia ai se public servant mo lenei faailoga taualoa ae masani ona filifilia i Leoleo. O Fusi o le alo faasino i le Susuga i le Toeaina Rev. Setu Amosa ma le faletua o Fetufaasinoala Alama Amosa ua fai i lagi le folauga.
O Fusi foi o le Tausi o le Tofa Mulitalo Lance Slade ma o loo galue foi Mulitalo o se Senior Constable i le Police Department i lenei lava aai o Newcastle.
O le faamatalaga o le faailoga taualoa o loo otooto atu i lalo aemaise o le faafetai a Fusi ina ua ia maua lea taui maoae.
E to‘a 150 i latou na faatulai mai e a latou uo mo le tauvaina o lenei faailoga, le 2014 Commissioner’s Perpetual Award for the Advancement of Women in Policing.
Na faasolosolo le iloiloina e le afioga i le Komesina ma Sui Sinia o le matagaluega o le to‘a 150 ma tuuitiitia ifo ai i le 50, mulimuli ane ua pa‘ū ifo i le 13.
E ono vaega sa vaevaeina i ai faailoga e maua:
1. Role Model
2. Local Hero
3. Mentor
4. Philanthropy
5. Dynamic Leader
6. Champion of change
O le faletua ia Fusi na faatū mai mo le Vaega 4: Philanthropy – o se tamaitai faigaluega ua faatauto pe lei faatautoina foi, ae na te faaalia ma faatino uiga alofa lē manatu faapito, e iai ona uiga magafagafa, e manatu mamafa mo le lelei o isi, ma lotoalofa i isi tagata (alii pe tamaitai) i totonu o le galuega.
O le upu lea “Philanthropy” o loo faamatalaina i le Macquarie Dictionary o le alofa i uso a tagata, e faaalia i galuega mo se manuia o ē o loo faia i ai. Na maua e Fusi le silver award mo le Philanthropy.
Ae mo le aotelega o vaega uma e ono, na filifilia ai e le Komesina ma le laulau o faatonu le Golden Award e tuuina atu ia Fusi, ma o se faaeaea maualuga lea ua maua e se tagata faigaluega (public servant).
Faafetai Fusi mo lenei faaaloalo maualuga:
Na muamua lava ona faafetaia le Tamā o i le lagi mo Lona alofa lē faatuaoi mo ia. Ona momoli ai lea o lana faafetai i ona faauluuluga o lana galuega, le Komesina o le ofisa o Leoleo i NSW, Andrew Scipione mo lenei faailoga ua latou filifilia e tuuina mai ia te ia. Sa ia faafetai foi i ē o loo latou galulue faatasi, aemaise ona taitai i totonu o le galuega.
Na momoli foi lana faafetai faapitoa i lona tuaa, le susuga i le Faafeagaiga, Rev Setu Amosa ma si ona tina ua moe atu i tiasa ia Fetufaasinoala Alama Amosa, ona o le la tausiga alofa mo ia ua mafai ai ona ia maua le ola ma oo mai le tulaga ua iai nei.
Sa ta‘ua e fusi aoaoga o le alofa na totoina e ona mātua i lona fatu a o tuputupu a‘e, ia avea o ia o se tagata e loto alofa i isi, ma loto maulalo.
E lei galo foi i lana faafetai si ona toalua, susuga Lance Amosa, ma ona alo o Lincoln ma Calvin, i le telē o le latou pitolaau sa faatino e fesoasoani atu ai i ana taumafaiga.
E lē gata i lea o lana faafetai i ona uso ma tuagane, Alama, Ed, Pana, Tess ma Litara ma a latou fanau, Luisa ma Mya, sa lagolagosua malosi ia te ia i le tele o taimi.
Ae sili ai lana faafetai i lona Aulotu, o ē sa telē so latou sao i le fesoasoani atu ia te ia ma lona aiga, i faaiuga uma o vaiaso, i upu fautua ma timaiga na atili lava taoso ai le faatinoga o ona tiute seia oo ina ua ia maua lenei faaeaea maualuga mai lana galuega.
O le tulai mai o lenei alo o Samoa i nei tulaga aloaia i totonu o galuega i atunuu o loo nutimea faatasi ai ma le toatele o isi tagata o isi atunuu, o se luitau foi lea mo le toatele o tupulaga fai a‘e o Samoa auā se lumanai manuia e auala mai i le galue faamaoni i soo se tofiga poo se galuega e galue ai e lē gata i le malo, Ekalesia aemaise foi o aiga.
Auā o le upu masani lava a le atunuu, ‘O le ala i le pule o le tautua’.
