Manatu Aoao – “Ia Ola ia Keriso”
O lenei faamoemoe, o se faamoemoe sa lupe, a o se faatofalaiga a Tamā o le Matagaluega sa fau ao fau po. O le tausaga 2012, sa tatau ona faataunuuina ai, peitai ona o le tele o tuatuagia, lea na moe ai le toa se‘i aulia mai taimi tonu o le Aso Maliu o le tausaga nei.
O le ute o lenei faamoemoe, se‘i patipatia le alofa tunoa o le Atua sa Ia faatautaia ai le sā o autalavou o le Matagaluega i le 10 tausaga talu ona faavae mai e ala i se faafetai ma se faamanuina ma faafoi le viiga i Lē ou manū ua aulia mai ai le faamoemoe i lona 10 tausaga.
E le gata i lea, ae se‘i faafetaia le Atua ona o galuega a lona Agaga o loo vaaia le fegaoioiai ai i luga o le Matagaluega, ua vaaia ai pea lona faatuputupulaia.
Na muai momoli laau i Fogaa e ala i se faamua i le Atua, na taitaia e le Tamā Penisione o Samuelu Tuiai, (o loo maua pea lo la soifua ma le faletua penisione ia Tima Tuiai).
O nisi o tupulaga talavou sa faitauina le Tusi Paia o Velia Lui (Sui o tupulaga talavou mai le Pulega i Matu); ma le tatalo o Quentin Lemamea (Sui o tupulaga talavou mai le Pulega i Saute). Na lagiina le pese lotu e le aufaipese a Tupulaga o le Matagaluega i lalo o le taitaiga a le Aoao tausi-aiga o Simona Ene.
Sa tatalaina i se saunoaga autū a le susuga i le toeaina ia Rev Tauaaga Mataafa (FT) Ofisa Aoaoga Kerisiano. Mai lona uluai Ekalesia na faavaeina i le aso 13 o Novema 1983, seia oo mai i le pepe o le Matagaluega e pei ona sa faavaeina i le aso 24 Fepuari 2013, ma ua atoa ai nei le 28 o Autalavou i le 3 Pulega o le EFKS i Kuiniselani. Mai lea aofaiga, o loo iai le Autalavou i Townsville, Cairns, Metro West, faapea ma autalavou i lalo o le taitaiga a Aoao Misionare e toatolu – Morayfield, Alice Springs, ma Gold Coast.
Na maea e tasi finagalo iu ane le faatofalaiga a le fono a autalavou o le Matagaluega, e faia se tauvaga a “Manaia ma Taupou o le Talalelei” e avea ma tapenaga autū o le aso fanau.
Na taitoalua autalavou i le paga; o le isi e Taupou, a o le isi e Manaia. Ua faaigoa foi nei falelua taitasi i igoa o fugalaau Samoa; Ipswich ma Petesa Fou (Teuila); Caboolture ma Loganholme (Makerita); Logan East ma Centenary (Puafuatausaga); Pine Rivers ma Lou Ola ia Aogā (Maali); Northside ma Sulu o le Talalelei (Aute Samoa); Logan City ma Chermside (Matafiafia); Setima o le Ola ma Morayfield (Fuarosa); Le Lamepa ma Westside (Mosooi); Brisbane ma Papa o le Olataga (Faavavau); Southside ma Ipswich Central (Lagaali); Southwest Brisbane ma Ola Fou (Puataunofo).
E 4 ni vaega na faatulagaina ai le tauvaga: (1)Laei, (2)Gagana Samoa, (3)Taleni, (4)Siva Samoa. Na tapena foi Pulega e 3 mo faafiafiaga o le aso e tovā i ai le tauvaga.
O le Pulega a Saute na saunia le Sāsā ma le Siva Hip Hop. O le Pulega a Sisifo na saunia le Siva faale-Agaga ma le Siva Hip Hop. O le Pulega Matu na saunia le Mauluulu, le Contemporary Dance, ma le Hip Hop. Sa faafiafia ai ma le Aufaaili o le Penina o le Pasefika – i lalo o le taitaiga a le Susuga i le Faafeagaiga o Aofaiga Levi (FS) ma le Ekalesia EFKS Ipswich Central).
Sauniga o le Keke o le Aso Fanau
Na feulaina lamepa o le keke e Rev Kerita Reupena, ae tipiina le keke e faletua ia Binary, Senerita ma Autalaga. O le keke o le faamoemoe na saunia e le faletua o le failautusi, Shirley Leo ma le nofoaalo.
O le iuga la lenei o le tauvaga – Taleni – Taupou (Miss Makerita), Manaia (Mr Teuila); Gagana Samoa – Taupou (Miss Mosooi), Manaia (Mr Mosooi); Laei – Taupou (Miss Teuila), Manaia (Mr Teuila); Siva Samoa – Taupou (Miss Matafiafia), Manaia (Mr Puataunofo).
Taupou Manumalo Tuufaatasiga – Miss Matafiafia; Manaia Manumalo Tuufaatasiga – Mr Puafuatausaga. O le Mr & Miss Puataunofo (maua le tulaga muamua) – Tofu ma le Tusi Paia ma le Pese EFKS, Weekend for 2 i le Gold Coast (saunia e Sina World Travel). O le Trophy poo le ipu tele (saunia e Marsden Trophies), Easter Hamper, Teufugalaau, $300.00.
2. Mr & Miss Teuila – Teufugalaau, Easter Hamper, $200.00. 3. Mr & Miss Aute Samoa tofu ma le teufugalaau, Easter Hamper & ta‘i $100.00, faasolo atu ai lava seia oo i le 11, na mau faailoga uma.
O Faamasino o lenei tauvaga, na faamasinoina lava e Tamā o le Matagaluega; Kerita Reupena, Tauaaga Mataafa, ma Lauie Lupematasila.
O Sponsors o lenei faamoemoe o le Logan City Council – $2,000.00; Enchiro Freight & Screenprinting – Banner 1x8m o loo tusia ai le igoa o le Mafutaga ma faamanuiaga mo le aso & $200.00; Marsden Trophies – Saunia Trophies e 8; ma le ofisa malaga a le Sina World Travel – Weekend for 2 getaway i le Gold Coast.
Komiti Faafoe:
Peresetene o Rev Lance Tautiepa; Failautusi o Rev Pevise Leo; Teutupe o Lemalu Lemalu; Faasoi Maua (Ofisa o Aoaoga Kerisiano); Simona Ene (Aoao Malua tausiaiga); Henry Fata Ito (Aoao Malua Tausiaiga). Sa iai foi sui o tupulaga mai pulega e tolu faapea faletua o faafeagaiga ma tina sa lagolagosua i le Komiti i le faataunuuina o lenei faamoemoe.
O lea lava aso na tatalaina aloaia ai le CD a le Autalavou a le Matagaluega EFKS e pei ona pueina i le faaiuga o le 2012, ma faaigoaina o “Iesu e, le Alii e agalelei”. O le Taitaipese o Simona Ene (Aoao iu mai Malua).
