Foai le malo Farani i le Aoga faasaienisi a le Iunvesite Aoao

Ua faaalia le faafetai o le Aoga faa-Saienisi a le Iunivesite Aoao o Samoa i Le Papaigalagala i se fesoasoani tele o le a mafai ai suesuega o laau e ono maua ai vailaau o togafitiga ma le faamatagofieina o le tino.
O se laasaga maualuga i suesuega a le Iunivesite ma o le faafetai ua taulai i le Malo o Farani, aemaise o lona Konesula i Samoa nei le Afioga Vaimasenu’u Zita Martel, o ia lea na tauaao atu le masini lenei ua ta‘ua o le Rotary Evaporator i le Tapaau o le Iunivesite Aoao o Samoa, le Afioga Fui Leapai Tuua Ilaoa Asofou Soo.
Na talafeauga lelei le tauaao atu o lenei masini ma le asiasiga a le tamaitai polofesa o Phila Raharivelomanana o le Iunvesite a Tahiti. O lenei tamaitai e iai le tomai faapitoa i le vaega o le faasaienisi e suesue ai le tulaga o laau ma le tomai tonu ua moomia e faatautaia ai aoaoga ma suesuega i le masini lea ua ta‘ua o le Rotary Evaporator.
Sa mafai ai loa ona aoaoina faiaoga o le aoga o suesuega faasaienisi i le Iunivesite Aoao o Samoa.
E tāua tele le masini lenei i suesuega o laau, ma o se tomai ua iai nisi o le Aoga lenei ua faamoemoe e agai i ai a latou taumafaiga mo le faailoga aupito maualuga o le Ph.D poo le maualuga o le tikeri faafomai i le tomai lea faasaienisi.
O le oo mai o le tamaitai polofesa mai i Tahiti ona o le fia vaavaai i le feagaiga i le va o lea Iunivesite ma le Iunivesite Aoao o Samoa lea na amata mai i le tausaga e 2006. O se va galulue faatasi ua vaaia ai le fesuiaiga o alii ma tamaitai aoga o Iunivesite e lua i mataupu eseee. Ua toatele alii ma tamaitai o le Iunvesite Aoao o Samoa ua malaga i Tahiti i lalo o le polokalame lenei e feasiasiai ai sui o aoga e lua. O lea foi la e asiasi mai lenei tamaitai e faamautu le faaauau ai o nei polokalame ma o le masina o Me o le tausaga nei i le aso 31 e faagata ai talosaga mo lenei polokalame a le Iunivesite Aoao a Samoa ma le Iunivesite a Tahiti (French Polynesia).