O le toe a‘e atu o aoga maualuluga a le atunuu i le mae‘a ai o le Tutoatasi, o le a faamalosia ai loa ma le amataga o a‘oa‘oga i Mataupu faa-Kerisiano.
O se faiga ua faatautaia i le mae‘a ai o le pasia e le Palemene o Samoa o le faamalosia o a‘oa‘oga o mataupu faa-Kerisiano i aoga maualuluga a le Malo.
O tausaga ua tuanai e moni sa mafai ona fai mafutaga i aso taitasi e ala i le lotu e saunia a o lei amata a‘oa‘oga, ae e lei a‘oa‘oina mataupu faa-Kerisiano i aoga a le Malo.
O aoga lava a Ekalesia Lotu eseese i totonu o Samoa o loo faamalosia ai mataupu nei i a‘oa‘oga a le fanau. Peitai e lei iai ni mataupu faapea na faamalosia mo aoga maualuluga a le Malo.
O le faamalosia o nei a‘oa‘oga na manatu le Malo ua talafeagai i le tele o suiga ua iai le soifua o tupulaga talavou ma le toaitiiti o tupulaga ua vaaia ai le faamalosia o tu ma aga faa-Kerisiano, aemaise lava i latou o loo i aoga e lē o a‘oa‘oina ai ia mataupu.
O le vaiaso la lea ua mae‘a atu na faatautaia ai loa se fonotaga a faiaoga o aoga maualuluga i le atunuu e iloilo ai vaega o le Mataupu o Aoaoga Faa-Kerisiano o le a a‘oa‘oina i fanau ma faamautu ai loa o se tasi o mataupu o le a sue ai fanau i le sailiga o le Tusi Pasi o aoga a le Vasega 5 Maualuga, poo le Tausaga 12 ae lē gata i lea o le suega o le Tusi Pasi o le Vasega 13 auā o lea ua amata lava ona tele mataupu e faatautaia e Samoa latou nai i lo le tau toe ave i Fiti, o se tasi lea o suiga tele o le a faapea ona vaaia i tausaga o lumanai nei.
O le taumafaiga lava a le Matagaluega ia mautu vave lenei mataupu, lea la ua amata ai i le toe a‘e atu o aoga.
E ese mai Samoa i isi atunuu e pei foi ona vaaia i lenei vaitaimi i tala mai atunuu mamao, ua molimauina ai le tele o feteenaiga i le va o a‘oa‘oga a Malo ma le Lotu.
O Amerika lea ua matuā tele ai faamasinoga ua faia i le tetee o nisi o mātua i le faasā ai o soo se potopotoga poo se faiga lava e fesootai ai tamaiti aoga ma a‘oa‘oga a le Tusi Paia.
O aoga i lea atunuu ua tele ina faasā ai le tatalo a le Alii, ua faasā ai foi ona toe talanoaina le tusi Paia i nisi o mataupu e ono laga ai talitonuga faalelotu.
O loo faaauau pea tetee e oo mai i le taimi nei ona o le taofiofi o le talitonuga lea foi e toatele tagata Amerika o loo mulimulitai ma tapuai ai.
O le auga ma le faamoemoe o le faia o lea a‘oa‘oga mo faiaoga, ina ia lava tapena faiaoga ma malamalama i itu e tatau ona tagatagai i ai mo le a‘oa‘oina o le faakerisiano a o lei a‘e aoga mo le Kuata lona lua o lenei tausaga faaleaoaoga.
Na faaalia e le sui o le ofisa sinia o Aoga a le Malo, Seumanu Gauna Wong, “o lea fuafuaga ua faagasolo foi i totonu o Aoga Tulagalua ae mo aoga maualuluga a le Malo o le taimi muamua lea ua faia ai se a‘oa‘oga faapitoa mo faiaoga e tusa ai ma le a‘oa‘oina o lea foi mataupu”.
O faiaoga mai Aoga Maualuluga uma i totonu o le atunuu sa mafai ona auai i lea a‘oa‘oga i le ofisa autū o le Matagaluega o Aoga i Malifa.
