O loo ua i Aukilani i Niu Sila le aumalaga e toa tolusefuluono, a le komiti a tina ma tamaitai o le afioaga o Fasitoo-uta mai Samoa.
O le aumalaga e aofia ai ma se tasi o alii lauiloa i le taleni o le fatu pese Samoa faapitoa i alalafaga ma afioaga i totonu o le atunuu. Ae lē gata i lea, o se tamalaii foi ua iloga i isi agavaa e pei o le fai faleaitu, le afioga ia Tupai Faasalafa Tupai.
O le toatele o le aumalaga, o tina lava ma tamaitai o le komiti a le afioaga. E tolu vaiaso ua faamoemoe o le a nonofo ai i Aukilani, ma faagasolo ai nisi o fuafuaga mo le sailiga seleni e pei ona tuua ai le atunuu, ma le afioaga i Samoa. O siva ma faafiafiaga faatino, atoa ai ma se konoseti ua mae‘a ona tapenaina o le a maimoaina faasolosolo i vaega ma pitonuu o Aukilani e pei ona fuafuaina.
O le faamoemoe o le sailiga seleni, o le fia faaleleia lea o le maota poo le fale komiti, auā le faaauauina o galuega faagasolo o loo tautua ai mo tagata lautele o le nuu. E lē gata i lea, ae o loo silasila foi le komiti i le toe saga faaleleia atili o vai faamalu o le afioaga, ina ia faatumauina pea lona lelei ma le mamā i lona siosiomaga.
E tele isi mafuaaga o le saili tupe o le komiti, e pei ona faaalia e sui o le komiti, peitai o nisi galuega toe faalelei o le a tagai toto‘a i ai ma fuafua lava i le aofaiga o le seleni o le a maua.
O le feiloaiga ma sui o le komiti, ina ua faato‘ā taunuu i Aukilani, sa faalauiloa ai le autū ma le faamoemoe o le masii mai e pei ona ta‘ua. O le afioga ia Tupai Faasalafa e foliga mai o lana taleni ma meaalofa o loo fesoasoani tele i vaega ma faafiafiaga o le malaga.
O le afiafi o le Aso Toonai na tea nei, na faataunuuina ai le faaaliga muamua ma le taumafaiga a le aumalaga, i le nofoaga o le ekalesia Katoliko i Malaeola i Magele.
Ae pei lava ona faailoa, e tolu vaiaso o le a iai pea le malaga i Aukilani, ma o le taimi foi lea o le a faagasolo ai nisi o a latou faafiafiaga auā lava le sini ma le autū o le malaga.
