O le gagana Samoa, e lē o toe tau faailoaina i totonu o Niu Sila, ma ua avea foi o le gagana lona tolu lea ua faatāuaina e le malo, ma ua faatulagaina foi e a‘oa‘oina i totonu o aoga.
E lē gata i le a‘oa‘oina i totonu o aoga, ae ua iai foi lona taimi faatulagaina e faamanatuina ai i totonu lava o Niu Sila.
O le aso 29 o Me o le tausaga nei, o le Aso Sa lea na se‘i tuanai atu ananafi, na amata faamamaluina ai le vaiaso o le gagana Samoa i totonu o Niu Sila.
O le faatāuaina o le gagana Samoa, o se tasi lea o tulaga o loo atagia ai, le maualuga o taumafaiga a tamalii ma tamafanau a le atunuu, sa latou asaina le gasū o le taeao, e ala i le finauina o lea foi faamoemoe.
E iai le manatu e lē gata i le finau malosi ma le saili malo o tagata Samoa, peitai o se tasi lea o faamaoniga e saga faailoa ai le tulaga o le faigauo a Niu Sila ma Samoa, mai lava i le tele o tausaga ua mavae.
O se mataupu e lei faigofie ona tali i ai le malo o Niu Sila, ma taliaina aloaia, peitai o mafuaaga e pei ona ta‘ua, o le unai malosi a tamalii o le atunuu, tuufaatasi i ai ma le amanaia ma le silasila o Niu Sila, i le la faigauo faapaaga ma Samoa, sa faafaigofie ai ona ioeina ma aloaia le gagana Samoa.
O totonu o aoga uma a le atunuu, amata mai i aoga amata e oo atu i iunivesite, e laugatasia uma i le fuafuaga a le malo. E oo lava foi i totonu o galuega ma falefaigaluega, ma nofoaga faitele sa tutusa uma i le faamanatuina o le gagana Samoa. E lua aoga i Aukilani o loo matuā maualuga ai le a‘oa‘oina o le gagana Samoa, mai lava i vasega laiti seia oo i le tausaga valu ma le iva.
O le aoga a Robertson Rd i Magele, ma le aoga a Finlayson i Manurewa i Aukilani i Saute. Na asia e le Samoa Times le aoga i Robertson Rd i le faaiuga o le vaiaso, ona o se tasi o aoga e pei ona ta‘ua o loo matuā faatāuaina tele ai le a‘oa‘oina o le gagana Samoa.
O vasega laiti e amata i le 80 pasene le gagana Samoa, ae 20 pasene le faaaogāina o le gagana Peretania.
Ona faasolosolo ai lava lea i isi vasega feoloolo a‘e i luga e ta‘i 50 pasene gagana e lua, a o vasega valu ma le iva o loo faaaogāina le 80 pasene o le Igilisi, ae 20 pasene le gagana Samoa. O se faiga e matuā tāua tele, ma e aogā mo le fanau auā o le a lē toe mafai ai e tamaiti ona motusia le faaauauina pea, atoa ma le lagonaina pea o le gagana Samoa i totonu o a‘oa‘oga.
Ae o se toe tepa, ma toe manatunatu i le amataina mai o lea foi taumafaiga, sa tulei ai le mataupu ma faaofi ai i totonu o le malo ma ona upufai, e manatua ai nisi o tamā ma tina sa latou tauivi ma finauina le mau.
O nisi o tamalii ma faletua faatasi ma tamafanau sa latou amata mea, ma finauina le amanaia o le gagana Samoa i Niu Sila
Sa fesiligia nisi ona o le agaga ina ia faasoa mai lagona ma finagalo, sa mafua ai ona faamalolosi e ave le mau ma le mataupu. E tāua tele ina ia avea pea o se luitau, ma se autū e tatai i ai ma fai ma pine faamau i mafaufauga o tupulaga fai a‘e o le atunuu mo le lumanai, le galuega fita ma le saili malo o tuaa ma matua.
Vavao Fetui (The University of Auckland)
Dip TESL, BA, MA.
Undergraduate Advisor Samoan
Co-ordinator of Samoan Courses
O se saunoaga mai le susuga ia Vavao Fetui, o loo faiaoga i le Iunivesite aoao i Aukilani.
E tāua tele le gagana Samoa i soo se aoga. O le ala foi lea sa taumafai ai lava ina ia faaofi le gagana Samoa i totonu o le faatulagaina o mataupu a‘oa‘oina i totonu o Niu Sila.
Sa iai lava le talitonuga e telē se aogā i fanau, ma e tāua tele le avea o le gagana Samoa, o se tasi o itutino o mataupu a‘oa‘oina i totonu aoga.
O lea ua latalata i le 10 tausaga talu ona amata faamamalu ma amanaia le gagana Samoa i totonu o Niu Sila. Peitai ua leva lava ona tusia ma iai le gagana Samoa i totonu o polokalame a aoga. Amata mai lava i le Level Three agai i iunivesite le a‘oa‘oina o le gagana Samoa.
O aoga amata Samoa, e lē taumatea lava o loo matuā faamamafaina ma faatāuaina ai le a‘oa‘oina pea, ona ua mautinoa o le faavae mautu lea o fanau, o le malamalama lelei i le latou lava gagana muamua.
O le tausaga nei foi ua mafai ai ona siitia le isi laasaga o le faatāuaina lava o le gagana Samoa. Ua pasia ma tali foi e le NZQA, le faatupeina o sikolasipi mo le gagana Samoa. O se tasi o avanoa tāua tele e lē gata i alo ma fanau a Samoa, a o le toatele foi o isi tagatānuu o loo fia a‘oa‘oina ma fia maua le malamalama i le gagana a le atunuu.
O totonu foi o le Iunivesite i Aukilani o loo ua vaevaeina i vaega e tolu le a‘oa‘oina o le gagana. E amata i le faatomuaina ma le tatai o soo se tasi lava i avega faigofie o le gagana.
Ona sosoo ai lea ma le vaega lona lua, o le amata ona faamasani i upu ma le faaaogāina o taimi sa‘o ma le gagana sa‘o. O le vaega mulimuli, o le a a‘oa‘oina ai le loloto o le gagana, aemaise lava i latou mai isi atunuu o loo tumau pea le fia silafia atili o le gagana.
Dr Tafili Utumapu-McBride
(Auckland University of Technology)
O le soifuaga atoa o le tagata Samoa, o lana gagana. E iai foi vaega tāua tele o le tagata Samoa e fai ma taiala ma faatonutonu i lona soifuaga, i le a‘oa‘oina o le gagana Samoa, aemaise lona tāua i le faaaogāina.
Le va ma mātua
O le amataga lea, pei lava ona talitonu i ai le toatele, o faiaoga muamua lava lea o le tamaitiiti. O le amata foi lea o lona olaga a‘oa‘oina e lē gata i le gagana a lona atunuu, ae faapea foi i le tele lava o isi vaega tāua o lona olaga. O le tiute lea o mātua, o le a‘oa‘oina o le tama ma le teine, i le gagana, faaaogāina o le faaaloalo, ma isi tu ma aga a Samoa.
Totonu o Lotu ma Ekalesia
E tele foi le sao o lotu i le a‘oa‘oina o le gagana ma lona faaaogāina. O le tu ma aga faakerisiano e o faatasi ma le gagana faaaloalo a le Samoa. O le isi laasaga lea e oo atu i ai soo se tagata lava i lona tuputupu a‘e i totonu o le aiga. E tāua tele la Lotu ma Tapuaiga auā e fesoasoani mo le faatumauina o le gagana, tu ma aga a Samoa.
Aoga ma Faleaoga
O le isi foi lea faavae mautu e saga faamautuina ai le malamalama i le gagana. A misi e le tama ma le teine, le faleaoga muamua o mātua, e tatau ona maua i totonu o le Lotu, a leai o lona avanoa mulimuli o totonu o aoga ma faleaoga.
E tāua tele le galuega a le faiaoga i le a‘oa‘oina o le gagana Samoa. O vaega ia e tolu ou te manatu, e amata mai ai le faatāuaina o le gagana Samoa.
O isi a‘oa‘oga e pei o le tatalo mo le lotu, tatalo i taimi o meaai ma taumafa, tatalo i le taimi e moe ai.
O le olaga kerisiano, soifua faaaloalo e pei o le faaaogāina o le Faafetai ma le Faamolemole, o nisi ia o vaega faigofie e amata ai ona faataitai ma a‘oa‘oina ai le gagana ma lona faaaogāina.
O le toatele lava o nisi, sa lē mafai ona manatu mamafa, ma soifua manatunatu i le tāua ma le aogā o le gagana Samoa i le soifuaga o le tagata Samoa. Ae ina ua matua ma ulufale i aoga, e pei o i faato‘ā amata ai ona lagonaina le tāua ma le aogā o Lana gagana.
O tamaiti foi na soifua a‘e i Niu Sila ma atunuu i fafo, e manaomia tele e latou le gagana. O vaega e pei ona ta‘ua muamua, o le faasologa lava lea e tatau ai. O aiga, o lotu ma ekalesia, ma aoga.
E tatau ona galulue faatasi mo le faafaigofieina i fanau ona malamalama ma faaaogā le gagana, ae ia sili lava ona a‘oa‘oina ma ta‘u i ai le tāua o lana lava gagana muamua mo le agai i le lumanai.
O le faletua ia Dr Tafili, o se tasi lea o faataitaiga lelei ma le aogā mo le tele o aiga i Niu Sila ma Samoa foi.
O Tafili ua faaipoipo atu i se alii papalagi, ma e toalua o la alo, o se masaga, peitai o loo faaaogāina pea le tulaga e pei ona ia ta‘ua, e aoao ai le fanau i le gagana Samoa.
Sa ia ta‘ua e faapea, o ia ma lona tina o loo matuā tu malosi ina ia aua ne‘i motusia le gagana i le fanau. O le mitamitaga foi i lona tina le faafofoga ane, o faaaogā e fanau e ui o le palagi le tamā, ae o loo fiafia e tautala i le gagana Samoa ma le Igilisi foi.
Aua ne‘i galo, o le tele o le ave o le fanau e tausia ma vaai e mātua o mātua (grandparents), o le isi auala lelei lava lea, ma le vave ona maua ai e tamaiti le manino ma le malamalama, atoa ai ma le faaaogāina o le gagana Samoa, auā o le tofi ma le faasinomaga mai le Atua.
