“Ua valu tausaga o ou nofo pologa i nei tuuaiga le sa‘o”…Onosai Nofoaiga
Ua sauni le alii o Onosai Nofoaiga, e faaulu se tagi (su) faasaga i le kamupani vaalele o le Polenisia ona o tuuaiga sa faasaga ia te ia na molia ai i ni moliaga e 95 o le gaoi a o avea ma tagata faigaluega, ma moliaga e 65 o le faia o ni faiga taufaasese i faamaumauga tau tupe a le kamupani, a o galue ai i le vaega o tupe a le Polenisia.
O ia tuuaiga na afua mai i ni faaletonu tau seleni a le Polenisia na tulai mai i se vaitaimi o Tesema o le tausaga 1998 e oo i le masina o Ianuari o le tausaga e 2003.
E silia i le $162,000 tala se tupe atoa na aafia ma faapea ona tuuaia ai Onosai. O le tausaga e 2007 i le aso 15 o Iuni na lauina ai lona faasalaga ina ua ia ioeina moliaga uma sa tuuaia ai lea na faasala ai i le 4 tausaga ma le 6 masina i le falepuipui. Peitai a o lei faia lea faasalaga sa toe sui le tali ioe a Onosai i moliaga uma i le tetee.
Ae sa le manuia taumafaiga a lana loia sa finauina ona moliaga e toe suia i le tetee lana tali i ni faaiuga na faia e le Faamasino Sili sa faatautaia le mataupu.
E ui ina sa faatumau ai pea lana ioega ma aumai ai loa le faaiuga na faasala ai i le falepuipui, ae sa ia toe apiliina le faaiuga faatasi ai ma le lē talia e le faamasinoga o lana talosaga e sui lana tali ioe i le tetee.
O le tausaga lava e 2007 i le faaiuga a le faamasinoga o talosaga apili poo le court of appeal na talia ai lana finau ma faatonuina ai loa le suia o le tali ioe i le tetee, ma ia toe ave le mataupu i le faamasinoga maualuga e toe suesue ai. O le Aso Gafua na tea nei, 29 o Mati 2010 sa faatulaga e valaau ai molimau a leoleo. Peitai na talosaga loia a le Malo e faaui uma i tua moliaga ona ua iai se faaletonu ia latou molimau.
O le mafuaaga lea na talia ai loa e le faamasino sili le afioga Tiavaasu‘e Patu Falefatu Maka Sapolu le talosaga a le loia a Onosai, ina ia faalēaoga uma moliaga.
I se talanoaga ma Onosai na ia faaailoa mai ai lona mafatia tele i ia tuuaiga i le valu tausaga ua mavae, ae o lea ua faailoa ane e loia a le Malo ua faaletonu molimau.
“O ni tuuaiga sa faamasagia ai lo‘u tagata i lo‘u nuu aemaise o ou aiga, ma ua manatu ai e tatau ona su le Polenisia”, o le finagalo lea o Onosai Nofoaiga.
Ua faailoa foi lona naunau e faatino lea tulaga ona ua le gata ina aafia ai lana galuega sa avea ai ma supavaisa i le vaega o tupe a le kamupani vaalele, ae ina ua salalau lipoti i tupe ua leiloloa a le Polenisia sa amata mai ai loa ona faaleagaina lona tagata i tuuaiga ua iu nei ina le mafai e leoleo ona faamaonia.
E toalua isi tagata faigaluega sinia a le kamupani vaalele sa molia foi i tupe na toesea a le Polenisia, peitai sa taunuu suesuega a le faamasinoga i le lē faamaonia o moliaga faasaga i ia tagata faigaluega sinia.
